Tuesday, June 16, 2015

Matuang tugang sinaksak an ngohod sa pagsurog sa ama

LABO, Camarines Norte—Sinaksak kan matuang tugang an saiyang ngohod na tugang na lalaki sa kainitan kan diskusyon na imbuelto an saro pang tugang na babae sa banwaan na ini kan sarong aldaw.


Sabi kan mga imbestigador, an incidente nangyari poco mas o menos alas 7 nin aga sa Purok 5, Bagong Silang II sa banwaan na ini.

An victima iyo si Jheron Matriano y Racelis, 22 anyos mantang an suspechado iyo si Ranilo Matriano Jr y Racelis, 25 anyos, pareyong residente kan sinambit na barangay.

Sabi kan mga nag-imbestigar, antes na mangyari an krimen, an victima asin an saiyang tugang na si Shenalyn Matriano y Racelis nagkaigwa nin mainit na diskusyon.

An saindang magurang na si Ranilo Matriano y Terrible nagdulok para sawayon an iwal kan magtugang huli ta naheling kan ama na burat si Jheron.

Dae aram kan ama, si Jheron nagpurot nin kapidasong kahoy asin nag-ansyas na rapadohon sa likod an saindang ama.

An suspechadong si Ranilo na nagmamasid kan pangyayari dae nakatios kaya tinusok kaini nin kutsilyo an lawas kan saiyang ngohod na tugang na iyong naging causa kan saiyang kagadanan.

Ipinahayag kan suspechado na dae maako kan saiyang boot si plano kan saiyang ngohod na tugang na rapadohon nin kapidasong kahoy an saindang ama, kaya nagibo niya an krimen.

Mientrastanto, dinara tulos an victima sa Labo District Hospital para ipabulong.

Alagad, pigdeclarar siyang mayo na nin buhay, sabi ni Dr. Jose Vernon Padilla.

Pagkatapos kan incidente nagdulag an suspechado pasiring sa dae maaraman na direksyon.

Dinara an bangkay kan victima sa Funeraria Adea – Labo Branch, para sa post mortem examination asin autopsy.

An iriwal nin magturogang iyo an sinasabi na motibo kan krimen.

Sa ibong na lado an Municipal Police Station kan banwaan na ini sa pamamayo ni PSupt Geoffrey N. Fernandez an nag padara tulos nin mga tawohan para imbestigaran an pangyayari.

Naglansar man nin hot pursuit operation an pulis tanganing madakop an suspechado asin masangatan nin caso. —BICOLSTANDARD.COM Pirming enot. Pirming bago.
Share:

Featured Post

Albay PENRO arrested in drug bust

LEGAZPI CITY 10/19/2017 (Bicol Standard) – The Chief of the Provincial Environment and Natural Resources Office (PENRO) of the Departm...