Civilian nagadan kan mag-atake an NPA sa Capalonga

CAPALONGA, Camarines Norte—Nagadan an sarong civilian sa Barangay Alayao kan magsakyada an mga pigtutubodan na miembros kan New People’s Army (NPA) alas-9 nin aga kasoodma.


Si Captain Marjorie Panesa, an parataram kan 9th Infantry Division kan Army na nakabase sa Camarines Sur nagsabi na an victima iyo si Mandy Ritero, 60 anyos, empleado sa Capalonga College, alagad residente kan Barangay Bagong Bayan, sa banwaan kan Daet.

Naggagamit kan grasscutter si Retiro kan siya tamaan kan mga rebelde, na pigpuesto an saindang mga sadire mga 300 metros hale sa detachment kan Army asin 5 hasta 10 metros hale sa eskwelahan.

Dai nagpaputok an mga soldados ta aram nindang may klase asin may mga estudyante na pwedeng tamaan, pahayag ni Panesa.

Dinara pa kuta si Retiro sa Capalonga Medicare Hospital, alagad pigdeclarar siyang gadan na kan pag-abot pa sana sa hospital.

Mientrastanto, an 49th Infantry Battalion asin an mga miembros kan Philippine National Police (PNP) sa Capalonga naglansar nin separadong imbestigasyon kan nangyari. —BICOLSTANDARD.COM

Start typing and press Enter to search