CASURECO III, papanaguton kan Sangguniang Bayan kan Baao

BAAO, Camarines Sur—Plano kan Sangguniang Bayang kan banwaan na ini na magsangat nin petition sa Casureco III katakod kan mga nadanyaran na mga kagamitan kan mga konsumidores kan banwaan.

CASURECO III
Kua ni Melvin Machado

Ini nin huli kan paburubrownout poon pa kan nakaaging duwang semana dara kan pagkaraot kan mga lumang linya na nakatakod sa Feeder 5 kan Pabrica, Bula, Camarines Sur pasiring sa banwaan nin Baao asin itaas na parte kan Iriga city.

Boot na papanaguton kan Sangguniang Bayan kan Baao an Casureco III sa mga danyos perjuicios na pinagdara kaini sa mga tao, kaiba na an mga helang na suboot naglala gikan sa pangyayaring ini.

Napag-araman kaya kan Sangguniang Bayan kan imbitaran an representante kan kooperatiba na si Engr. Dan Michael Iblan na may naging pagkukulang an kooperatiba.

Inako kaini na napasala sa pagkabit kan mga linya na naging kawsa nganing pabalik na an pag-ikot kan mga de-motor na kagamitan asin dagos nang magkararaot an mga ini.

Saro sa mga naapektuhan iyo mismo an si Vice Mayor na si Cherry Sapugay na guminasto nin nasa 150,000 de pesos para mapairahay an motor kan saiyang negocio.

Ano man na aldaw ngonian na semana, kokolektahon na kan banwaan an mga reklamo kan mga apektadong miembros kan saindang banwaan na boot maghagad dispensa sa Casureco III.

Siniguro man kan ni Engr. Iblan na nagtatao man suboot an kooperatiba nin dispensa sa mga arog kaining kaso.

Nangako pa ini na dai nin power interruption an casureco III sa mga masurunod na aldaw asin matao sinda nin abiso bago magsagibo nin pag-irahay kun mag-abot na an dagdag na mga materyales.

Sa presente, pigbabalyo an mga linya na 50ng taon na nakatakod sa Bula, Baao, asin Iriga City.—ni Jon-jon Oyales, BICOLSTANDARD.COM

Start typing and press Enter to search