Tuesday, June 9, 2015

Ahente nin cemento, pigreklamo nin pansuba

CIUDAD NIN NAGA—Casong pansuba (Estafa) an planong isangat ni Milany Tanlo-Lungay, taga Sta. Mesa, Abella, contra ki Mark Jensen Martinez, kan dae saiya ideniliver an 300 na sakong cemento na binakal niya sa nasambit na persona.

Retrato hale sa Pixabay, kua ni geralt
An victima iyo an comptroller kan Jamys Aluminum and Construction Supply sa Zone 3 Concepcion Peque ña digdi.

Segun sa pahayag ni Tanlo-Lugay sa mga imbestigador, nag-entrega siya nin kantidad P62,000 na cheke ki Martinez tangani na deliveran nin 300 na sako nin La Farge na cement sa aldaw kan saiyang pagbakal.

An binakal na cemento, susog sa saiyang orolay, dapat darahon kan binakalan sa saindang warehouse sa Palestina, Pili, Camarines Sur.

Pero, nagtapos na lamang an aldaw, mayo nin cemento na nag-abot sa saindang warehouse, kaya pirang beses siyang nagpaguiromdom sa binakalan.

Kada pag-apod niya ki Martinez, an itinataong rason iyo na naraot an saindang delivery truck kaya dae tulos maihahatod sainda an binakal na cemento.

Si Martinez, sabi pa kan nagrereklamo, konektado sa Top Serve Man Power Solution Inc., na may oficina sa Geronimo Building, Barlin St., Sta Cruz digdi.

An informasyon na nagtatrabaho talaga si Martinez sa sinambit na companiya pigconfirmar kan saiyang employer na si Mike Maralit.

Mientrastanto, apisar kan surat na ipinadara na ninda sa companiya, dae pa guiraray ipigdedeliver sainda an efectos na saindang binakal.

An casong ini pig-iimbestigaran ni PO2 Cortez kan Naga City Police Office.—Report ni Boyet Paderes BICOLSTANDARD.COM Pirming enot. Pirming bago.
Share:

SPECIAL OFFER

SPECIAL OFFER

Featured Post

Sorsogon mayor, 2 others charged in Sandiganbayan

SORSOGON CITY 5/23/17 (Bicol Standard) -- Ombudsman Conchita Carpio-Morales has recommended the filing of criminal charges against Bu...