Wednesday, May 13, 2015

Detinido sa Tinangis Penal Farm nakuanan shabu

PILI, Camarines Sur—Mahiwas na imbestigasyon an gigibohon kan mga awtoridad dapit sa nakuang sarong sachet nin shabu sa poder kan sarong detenido sa Provincial Jail sa Tinangis Penal Farm digdi.

An nakuanan kan bawal na bulong iyo si Richard Alcober y Sauco, 35 anyos, soltero, nakukulong sa Penal Farm sa casong pagbalga sa Republic Act 9165 o an inaapod na Dangerous Drugs Act.

An suspechado na taga Zone 4, Balatas, Naga City, nadiscubre kan guardyang si Domingo Gonzaga na may saray na shabu, kaya siya nagsumbong tulos sa awtoridad.

Base sa pagsiyasat, nagkapira nang bulan si Alcober na pigmamasdan kan mga guardya na garo nakakapalusot pa nin droga kada may magdalaw saiyang bisita.

Huli kan siring na pangyayari, nagsumbong an mga nagmamanehar kan Tinangis Penal Farm sa pulis kan banwaan na ini tanganing sinda mismo an maggibo kan pagdakop sa suspechado.

Kan magpositibo an saindang suspecha, tulos nagpadara nin tawohan an mga pulis, dangan dinakop si Alcober.

Afuera saiya, an iba pang mga pag-iriba sa saindang selda an iimbestigaran, dahil sa posibilidad na igwa pang iba na nanakanamit pa kan ipigbabawal na bulong.

An pagdakop ki Alcober nangyari poco mas o menos ala-1 nin hapon, kan fecha 11 ngonian na Mayo, sa laog kan saiyang selda.

Mientrastanto, pinapatuga ngonian kan mga imbestigador kun sisay an pwedeng kasapakat ni Alcober sa saiyang mga kairibahan sa kulungan, kun igwa man.

An manehamiento kan Tinangis Penal Farm an nakatalaan na magconducir nin hararom na imbestigasyon manongod sa pagkuriyat kan ipinapangalad na bulong sa laog na mismo kan presohan.

May suspecha an mga awtoridad na haloy nang nangyayari an siring na pagpapalusot nin shabu sa laog kan nasambit na lugar. Alagad, ngonian sana sinda nadakop kan mga awtoridad. (BICOLSTANDARD.COM)
Share:

SPECIAL OFFER

SPECIAL OFFER

Featured Post

Chief Supt. Gardiola assumes as Bicol top cop

LEGAZPI CITY 7/10/17 (Bicol Standard)--Police Chief Supt. Antonio N. Gardiola has been installed as the Acting Regional Director of...