Aki nin taga Minalabac, kandidato bilang Member of Parliament kan Britanya

CIUDAD NIN NAGA—Sarong aki nin ina na taga Salingogon, Minalabac, Camarines Sur na an ama, Chinese, alagad ngonian ciudadano na sa United Kingdom, an napapalaban ngonian na kandidato sa Parliamento kan Britanya, sa nagdadangadang na election fecha 7 ngonian na bulan.

An 25 anyos na si Steven Dominique Cheung (nasa tahaw, nakataas an walang kamot) iyo an pinakajoven na kandidato sa British Parliament elections. (Retrato hale sa oficial na website ni Cheung)
Si Steven Dominique Cheung, 25 anyos, na aki ni Ami Biazon Oliverio-Cheung, namundag sa Hongkong.

An saiyang Intsik na ama, kusinero, mantang an saiyang ina, cleaner o paralinig, sabi kan South China Morning Post.

Si Steven asin an saiyang ina na si Ami Oliverio Cheung
(Retrato hale ki Ami Cheung)
Kan 2002, an saindang familia naglipat sa London.

Nag-escuela si Steven Dominique Cheung sa Health Cote school asin Highams Park College.

Mantang nag-eeskwela duman, sinaysay ni Steven kun pano siya inapi kan saiyang mga ka-eskwela, huli ta siya miembro kan minority. Ini an nagtao saiya nin kusog nin boot na i-representar lugod an minoriya.

Digdi nadiscubre an saiyang abilidad kan gobierno, kaya siya tinawan nin trabaho bilang advisor kan Youth Citizens Commission.

Bilang bibo na joven na estudiante asin sarong achiever, nagi siyang radio presenter asin naging host sa mga shows sa tataramon na English, Cantonese asin Mandarin.

Kan 2009, tinawan siya kan prestigiosong Princess Diana award, sa pag-inspirar kan mga jovenes.

Na elihir siyang Young Mayor kan Olympic Village asin iyo si nagdara kan Olympic Torch kan Britain kan 2012.

Mientrastanto, an 25 anyos na joven, nakua na an boot kan mga Britons asin Intsik.

Aktibo man siya sa Filipino community sa nasambit na nasyon, kun sain an Philippine ambassador mismo an nagpasalamat sa saiyang suporta.

Sa entervista kan BICOL STANDARD sa ina ni Steven, sinabi kaini na an saiyang aki mahilig sa sinigang, barbecue, adobo, asin iba pang pagkakan kan mga Pilipino.

Sinaysay man kaini na si Steven nakapuli na sa Minalabac, kun sain sya nag-atender nin kasal kan kahimanwa.

Nakapasyar naman siya sa provincia nin Albay.

Nagtatrabaho sa financial sector sa United Kingdom, siya nagdadalagan ngonian bilang kandidato para miembro kan Parliamento kan Britanya, sa grupo kan Liberal Democrats.

Manggana, madaog sa election si Steven Oliverio Cheung, pig-oorgulyo kan saiyang inang Bicolana, an saiyang padagos na nagmamantinir nin liputok na relasyon sa pinaghalean kan saiyang magurang, na propiong taga Salingogon, Minalabac, Camarines Sur.—BICOLSTANDARD.COM

Start typing and press Enter to search