Tuesday, May 5, 2015

San Jose Bridge sarado sa traffic poon Mayo 14 hasta 30

PILI, Camarines Sur—Ipinahayag kan oficina kan DPWH 2nd Engineering District na totalmenteng sarado sa mga vehiculo an San Jose Bridge, poon fecha 14 hasta 30 ngonian na Mayo.

Stock photo kan San Jose Bridge
Oscar Esmenda/BICOLSTANDARD.COM
An sinambit na tulay pigbagohan kan DPWH tanganing mapadakula asin mapapusog para sa nagdadakul na numero nin mga vehiculo na nag-aagi palaog asin paluwas sa Region Bicol.

Durante kan session kan Sangguniang Panlalawigan, sinabi kan DPWH na gigibohon sa fecha 14 hasta 15 ngonian na bulan an pagcemento kan salog kan tulay, kaya dae ini pwedeng matanyog kan nag-aaging mga vehiculo para maging pusog an pagkagibo.

Sa fecha 16 kan Mayo, pwede na ining agihan nin mga motorsiklo o lakawan nin mga tawo. Alagad dapat ibusol sana an motorsiklo para dae mahiro an pinapatagas na cemento.

Idinagdag kan DPWH na poon sa fecha 19 ngonian na bulan, hasta fecha 30, pwede na ining paaguihan nin mga tricycles, kun ibubusol sana, asin dae nag-aandar an makina.

Sa Mayo 30 saka pa sana bubukasan liwat an tulay sa gabos na clase nin vehiculo.

Mientrastanto, pig-avisohan an gabos na mga drivers na pwede sindang mag-agi sa San Fernando-Antipolo, Minalabac, pasiring sa banwaan nin Pili, bilang alternate na agihan.

Pwede man na paghale sa Pili, maglaog sa Barangay Mataoroc, Minalabac pasiring sa Poblacion, Minalabac, asin magluwas sa banwaan kan Milaor, Camarines Sur.

An sinambit na oficina nagpahayag na ginigibo ninda an magkakanigong coordinasyon sa mga lugar na aagihan para dae malagalag an mga viajeros.—BICOLSTANDARD.COM
Share:

Featured Post

VG Pimentel lobbies for CNorte hospital upgrade

Camarines Norte Provincial Hospital Photo via https://www.facebook.com/pages/Camarines-Norte-Provincial-Hospital/216874988337215 DAE...