Monday, May 25, 2015

Nagprobar magholdup, rinapado nin payong

CIUDAD NIN NAGA—Sa haros oro-aldaw na sumbong sa blotter kan pulis, solamenteng report an nakukua kan mga miembros kan media.

Retrato hale sa Pixabay
Alagad, an mga suspechado bwelo sanang nakakagibo kan saindang gusto, na mayo nin peligro sa saindang ilegal na hanap buhay.

Kan sarong aldaw, an magtugang na si Henry Aquirre y Matubid, 38 anyos, taga Jazmin St. Tinago, asin si Henrieta Aguirre, 59 anyos, biktima na naman kan nasambit na mga criminal.

Sabi sa report sa media, an magtugang na Aguirre, mientras na pasiring sa Mayon Avenue, poco mas o menos alas 2:45 nin hapon, hinipaan nin duwang lalaki na nakalunad sa motrsiklo na mayo nin plaka.

An mga parahabon nakasulot nin helmet na tahob na entero an lalawgon.

Ipinahayag sa sumbong kan mga victima na kan matangodan sinda kan duwang lalaki, marikas na pigprobaran na agawon kan mga suspechado si dara-darang shoulder bag ni Henrietta.

Maray sanang dae nagpahunod an victima.

Hinurohombalan niya an mga suspechado kan saiyang darang payong, hastang makaisip na magdulag an mga lalaki pasiring sa direksyon kan Caceres St. digdi na mayong nakua nin ano man na bagay na gusto kunta nindang holdupon.

Mientrastanto, pag alas 2:50, o limang munutos sana pakalihis kan enot na incidente, an pusuanon na mga paraholdup nag-atake na naman sa saro pang victima.

Sarong lalaki na may pangaran na Dionesio Miguel y Olaguer, 52 anyos, taga Caceres St., City Heights Subdivision, Tinago, an nagreport na binirada man siya kan duwang lalaki.

An victimang si Miguel nag-estorya sa nagpondo sa saiyang tungod an duwang lalaki na nakalunad sa motrsiklo.

Kan panahon na ito, si Miguel yaon sa atubangan kan saindang harong, naghihirahay kan fuse kan saindang awtong Pajero.

Pagpondo kan mga holduppers, derecho na tinutukan siya kan armas na badil na dae aram an calibre.
Huli sa pagkabigla, mientras siyang natututokan nin badil, hinagad si saiyang cellphone, asin an itom na shoulder bag na may mga laog nin mga importanteng papeles asin mga gamit arog kan ATM cards, reading glass, cash na P3,000.00, asin mga bulong.

Arog kan dati, marikas na nagpaharorot kan saindang motorsiklo an duwang suspechado, na dae nabisto kan victima.

Mientrastanto, an pulis kan ciudad na ini mayong ikinakapaliwanag kun ano na an saindang plano sa dae nang katapusan na pag-operar kan mga kriminal.—BICOLSTANDARD.COM
Share:

SPECIAL OFFER

SPECIAL OFFER

Featured Post

DAET GARBAGE ISSUE | Sarion blames Ochoa; Ochoa to request for state audit of funds

Former Mayor Tito Sarion (left), incumbent Mayor Benito Ochoa (right) DAET, Camarines Norte—“The ball is now in the hands of the new ...