Thursday, May 14, 2015

2ng estudyanteng nagjogging sa Basilica, nagreklamo nin pantsansing

CIUDAD NIN NAGA—Duwang babaeng estudyante kan sarong bistadong unibersidad digdi an nagpaabot nin reclamo sa pulis kan sinda maging biktima nin pantsansing kan sarong lalaki na pwedeng may kakulangan sa pag-isip.

Stock photo via Pixabay
An mga victima nagsumbong sa mga awtoridad na kan sinda nag-eehersisyo sa sa Barangay Balatas, sarong lalaki na nabisto sa pangaran na Merciso Morsi, 32 anyos, taga-Barangay San Felipe an biglang kinapkap an saindang daghan asin iba pang mga delikadong parte kan saindang lawas.

Si Lilia asin Diana (bakong tunay na pangaran) 17 asin 18 anyos an mga edad, inabangan ni Morsi sa gilid kan tinampo, dangan ginibohan kan pambabastos.

An duwang mga estudiante nagsabi na naging ugali na ninda na maglakaw palibot sa tinampo kan Basilica kasabay kan dakul pang mga nag eehersisyo oro-aldaw.

Alagad, nabigla sinda kan biglang takmaon an saindang atubangan, derecho hiling sainda nin matarom kan lalaki.

Mayong naginibo an duwang mga estudiante kundi magpatuyatoy na sana padulag, parayo sa suspechado.

Susug sa informasyon kan mga pulis sa Precinto Numero 2 sa Concepcion Grande, bako sana ito nangyaring pambabastos sa sinambit na lugar.

Igwa pa nin mga naenot nang pangyayari, alagad mayo nin nagrereclamo, kaya dae nakakasohan an kaggibo kan krimen.

Sa parte kan duwang estudiante, nag-aalangan kuta sindang magpaabot nin reclamo. Kun bakong sa paagui kan makusog na boot kan mga magurang ninda, pwedeng malingawan na sana an pantsansing.

Huli sa siring na pangyayari, nangangapodan an mga awtoridad na magsumbong sa mga awtoridad kan mga nangyaring pambabastos sa sinambit na lugar.



Mantang sinusurat an baretang ini naisihan sa report kan pulis na an suspechadong si Morsi igwa na palan nin record sa mental hospital sa Cadlan, Pili, Camarines Sur.—Ni. Boyet Paderes, BICOLSTANDARD.COM
Share:

Featured Post

Albay PENRO arrested in drug bust

LEGAZPI CITY 10/19/2017 (Bicol Standard) – The Chief of the Provincial Environment and Natural Resources Office (PENRO) of the Departm...