Tuesday, May 26, 2015

Balangibog na narogba an Hong Enterprises, false alarm—BFP

CIUDAD NIN NAGA—“False alarm" an nabilog na conclusion kan mga miembros kan Naga City Fire Department na nagdaralagan pasiring sa Hong Enterprises na namumugtak sa centro kan ciudad na ini.

Hong Enterprises, Naga City
Retrato ni JV Hong

Poon pa kasoodmang alas-3 nin hapon, nagkuriyat an mga text messages na nagsasabi na may narugbang parte sa ikaduwang eskalon kan sinambit na masulong na tindahan nin mga bararatong efectos.

An mga tawohan kan Bureau of Fire Protection (BFP) katuwang an mga miembros kan Rescue Team marikas na nagresponde sa sinambit na lugar, na sinasabing may nangyaring disgracia.

Nadiskubre kan mga nag respondeng miembros kan Rescue Team na mayong katohanan an pinalakop na mensahe sa text.

Dawa siring kaini an obserbasyon kan mga nasa BFP, naglaog pa guiraray sinda sa edificio para maggibo nin biglaan na pag-inspeksyon kan mga lugar na pwedeng magdara nin peligro sa mga parokyano asin parabakal.

Naheling kan mga nagsiyasat na talagang grabeng maray an tambak na efectos na kadaklan mga papel asin materiales na plastic na an iba nakakaolang na ngani sa agihan kan mga parabakal.

An manehamiento kan Hong Enterprises nagpahayag na pakaraot sana ini kan ibang mga nag-oori sainda, orog nang mahibog talaga an saindang mga parokyano ta barato an saindang mga ipinapabakal na mga paninda.

Mientrastanto, kinaomagahan, binalikan kan mga miembros kan BFP an sinambit na lugar para repasohon an mga pampasegurong gamit, arog kan supply kan tubig asin iba pang gamit na pang-ampat kan kalayo, para maibitaran na mangyari an kasulo.

Sabi kan mga inspector, kumpleto man an mga panseguridad na gamit sa laog kan edificio kan Hong Enterprises, pero may mga kulang pa digdi.



Pinaguiromdom an kagsadire kan tindahan na hale na mismo sa saindang insyatibo an pagpaseguro na maibitaran an peligro orog na sa kasulo, na iyong pig-iibitaran ngonian na mainit na maray an panahon.— BICOLSTANDARD.COM. Pirmeng enot. Pirmeng bago.
Share:

Featured Post

VG Pimentel lobbies for CNorte hospital upgrade

Camarines Norte Provincial Hospital Photo via https://www.facebook.com/pages/Camarines-Norte-Provincial-Hospital/216874988337215 DAE...