Bicol newspaper | Bicol Standard | Get Bicol news about the Bicol region: Naga City, Camarines Sur, Albay, Legazpi City, Masbate, Sorsogon, Camarines Norte and Catanduanes.

Wednesday, April 29, 2015

Parasalakat nakadarang kantidad P200K na cuarta, alahas

CIUDAD NIN NAGA—Maabot sa kantidad P200,000 an nakua kan parasalakat sa barangay Tabuco digdi kan sarong banggui.

Stock photo from Pixabay

An victima iyo si Timoteo Cruz, 53 anyos an edad.

Base sa natipon na mga informasyon kan BICOL STANDARD, nagluluwas na nadiskubre ni Cruz na baralanggado na an mga gamit sa laog kan saindang harong kan mag-abot siya.

Enot na nareparo kan victima an bintana na raot, na iyong inagihan paglaog kan parasalakat.

Paghale sa bintana an parahabon naglaog sa saindang kwarto, dangan rinaot an sarong drawer na tinagoan kan saindang mga importanteng gamit, asor kan alajas asin cuarta na kantidad P100,000.00

An alajas tinawan nin valor na kantidad P100,000.00, kaya nag abot sa P200,000 an kabilogan kan nawaran sainda.

An mga imbestigador nagtutubod na inadalan na maray kan parahabon an pasikot-sikot palaog sa saindang harong, derecho sa saindang kwarto.

Hasta sa panahon na sinusurat an baretang ini mayo pang ikinakatukdong tawo na suspechado sa krimen.

Nagtutubod an mga imbestigador na pwedeng taga-digdi man sana sa haraning lugar an kaggibo kan pansasalakat.

Sa presente, sari-saring anggulo an inaadalan kan mga pulis tanganing masusug an gira asin dalan kan parahabon. (BICOLSTANDARD.COM) Pirmeng enot. Pirmeng bago.
Share:

Featured Post

Advantages and disadvantages of mother tongue-based education

Photo: Naga Smiles to the World by Shiela S. Ronquillo Del Gallego Central, Del Gallego District Since School Year (SY) 2012-2013,...