NA NAMAN ! | Indian national, nahold-up

NAGA CITY—Saro na naman na Indian national an nabiktima kan robbery hold-up sa provinciang ini.

Poco mas o menos alas 11 nin aga, fecha 7 kan Abril, kan parahon an victima kan tolong dai pa nabibistong mga persona, sabi kan report kan Camarines Sur Police.

Ini nangyari sa Barangay Port Junction, sa Rolando Andaya Highway, Ragay, Camarines Sur.
Anas nakatakop an mga lalawgon kan mga suspechado nin helmet o bonnet, sabi sa imbestigasyon.

An victima, na nabistong si Avtar Malhi y Singh, 32 anyos, asin residente kan San Bartolome St., Sipocot, Camarines Sur, an inagawan kan saiyang kantidad P1,500 na kwarta, motorsiklo, asin driver's license.

An tolong suspechado nagkuripas matapos makua an mga gamit kan victima.

Nin huli kan insidenteng ini, sarong follow-up investigation na an ipiglansar kan Ragay Municipal Police Station tanganing masosog an mga nagdulag na parahabon, asin panimbagon sa ley.—BICOLSTANDARD.COM

Start typing and press Enter to search