AMARO MASSACRE UPDATE | Alahas, armas linalay sa harong kan negosyanteng binadil gadan

MASBATE CITY—Nagpaluwas na nin progress report an pulis sa nangyaring pambadil sa sarong sikat na negosyante asin duwa kaining pag-iriba sa bawaan nin Aroroy, Masbate.

An insidente nangyari poco mas o menos alas-4:30 nin aga kan fecha 5 kan Abril.

Segun sa report, binadil gadan an negosyante na si Jesus “Ka Isong” Amaro,  Gilbert Amaro asin an bodyguard na si Ricky Almodiel kan siyam na suspechado sa harong mismo kan negosyante.

Si Jesus Amaro imbuelto sa negosyo nin small-scale mining sa banwaan na ini.

Idineklarar kan familia kan victima sa pulis na nagkapira sa mga gamit sa harong an nawawawara, kaibanan na an 130 kilos nin plata o silver na may kantidad na P520,000, mga alahas na bulawan na may kantidad na Php 520,000, asin manlaen-laen na armas asin laganan nin kwarta.

Mga nawawara sa residencia kan victima
Mientrastanto, nadiscubre man sa harong kan victima an tulong bala nin calibre .45 na badil sa sala asin kwarto. An mga ini, sa pagtubod kan familia, linalay kan mga suspechado.

Naireport man sa pulis na sarong motorsiklo, na sadiri ni Rodel Condrelon, an inagaw saiya kan saro sa mga pigtutubudan na suspechado.

Sa follow-up investigation kan mga autoridad, saro sa mga suspechado an nabisto kan testigo kan ini pahelingan nin rouge gallery.

Enot kaini, sinabi kan pulis na pinauranan nin paputok an harong ni Amaro pirang semana pa sana an nakaagi.—BICOLSTANDARD.COM

Start typing and press Enter to search