Monday, March 16, 2015

Trespasser, pinahibi sa tear gas ni ‘Tisay’

Trespasser, pinahibi sa tear gas ni ‘Tisay’
BICOLSTANDARD.COM

CIUDAD NIN NAGA—Dae nadagos an construction worker sa paglaog sa cuarto kan mistisang estudiante, pagkatapos na ini pakupsitan nin tear gas kan victima, mantang palaogon sa bintana kan saiyang pig-aarkilahan na cuarto.

An estudiante iyo si “Tisay” (bakong tunay na pangaran), 18, taga-Tagkawayan, Quezon.

Siya nag-eescuela sa Ateneo de Naga University.

Segun ki “Tisay,” ala una nin mag-omagahon kan siya napagmata, sa ragitnit kan pwerta na pirit na binubukasan kan suspect.

Kan dae mabukasan, nag-itok sa sarong kanto , pasiring  sa sliding window, na pirit nabukasan kan suspect.

Kan palaog na sa bintana, kun gurano an luway-luway na pag laog, iyo man si saiyang marikas na pag-atras huli ta pinakupsitan nin tear gas an mata kan magayon na daraga na nag-aabang na sa saiyang pag laog.

Palibasa tinamaan nin tear gas an saiyang mga mata, dae na maaraman kan suspechado kun saen maduman.

Bangga digdi, budal duman.

Sabi kan mga nakaheling garong bola nin bilyar na maski saen minabanga.

Napagmata an ibang mga boarders sa harong  asin nakua an suspechado na bungaw na .

Dinara an suspechado sa presinto kan pulis. Pag-abot pa sana,  dae siya nagtutuga kun ano an saiyang tuyo, ta gustong laogon an cuarto kan magayon na daraga.

Huli kan pursigidong paghapot kan mga awtoridad, napiritan na lang an suspechado na ituga an saiyang tunay na intention na molestyahon an magayon na estudiante.

An suspechado nabisto na iyo si Jose Cacayan y Bucado, 30 anyo, taga -Lipot, Milaor, Camarines Sur.

Sinangatan siyang casong tresspass to dwelling huli kan fuerzahan na paglaog sa harong na mayong paaram sa kagsadire kan boarding house.—ni Boyet Paderes, BICOLSTANDARD.COM
Share:

SPECIAL OFFER

SPECIAL OFFER

Featured Post

Daet P20M garbage project quizzed

Former Mayor Tito Sarion DAET, Camarines Norte — The pile-up of uncollected garbage in this town has urged residents to revive the inqu...