Rinconada area: Uda sulo, mangitnit!

Photo via Casureco 3 Facebook account
IRIGA CITY – “Uda sulo. Mangitngit!”

Iyon ini an kurahaw kan mga residentes sa Rinconada area, an lugar na sakop kan Camarines Sur III Electric Cooperative, Inc., na pinutolan nin supply nin kuryente kasubangong odto.

An sinambit na cooperatiba pirme na sanang igwang huma hale sa supplier nin kuryente na saindang pigcoconsumo huli sa dakulang nang kantidad na dae ninda nababayadan.

An pinakahuring informasyon nagsasabi na an coop may babayadan ngonian na bulan sa San Miguel Electric Cooperative (SMEC) nin kantidad P87 milyones, afuera kan iba pang obligasyon na an total P130 milyones na.

Kan saro pang aldaw dapat pinutolan nin kuryente an Casureco III, alagad an manehamiento nakimaherak.

Mientrastanto, sa ginibong Annual General Assembly kan Sabado tinawan nin dagdag na plazo sagkod kasubagong odto na mabayadan an sinambit na kantidad.

Alagad, dae sinda nakabayad.

Ini an informasyon na hale ki Administrator Fernando Turiano kan Casureco III.

Hastang sinusurat an baretang ini, an manehamiento kan cooperaba dae makasabi kun nuarin ninda pwedeng madisponir an P87 miyones na pambayad, asin kun nuarin pwedeng makabalik an ilaw sa sainda.

An mga banwaan na sakop kan Casureco III iyo an Bula, Baao, Bato, Balatan, Buhi asin an Ciudad kan Iriga.

Ibinabasol an pagkabangkarote kan cooperatiba sa salang pagmanehar, sobrang systems loss, dakul na maray na mga empleado asin corruption sa fundo.--Report ni Junjun Oyales – BICOL STANDARD Correspondent, Rinconada BICOLSTANDARD.COM Pirmeng enot, Pirmeng bago.

Start typing and press Enter to search