Tuesday, March 10, 2015

172 na persona nag obra suka sa Minalabac

MINALABAC, Camarines Sur—Pwedeng magdugang pa an 172 na mga residentes kan Barangay Salingogon digdi na nagreklamo na nagkahelang nin pag obra, suka, na may kaibang halangkaw na kalintura  sa laog nin tulo nang aldaw.

An report na nakaabot sa BICOL STANDARD nagsasabi na sarong semana sana an nakalihis pagkatapos na magcelebrar an nasambit na barangay kan saindang fiesta, biglang sarabay na nagkamate nin pagkulog nin tulak asin pag obra an mga residentes.

Kasoodma, an Municipal Health Office (MHO) nagpadara na nin mga personahes tanganing aramon an kamugtakan kan mga may helang.

Ipinahayag sa nagunong informasyon na kabale sa mga tawohan na hale sa MHO an saindang sanidad na ma-inspection kan pigkukuanan na inomon na tubig para segurohon kun saen naghale an helang.

Mientrastanto, saro nang persona an confirmadong nagadan, mantang dakul pa an may helang.

An mga oficiales kan barangay nagpaapod man tulos nin meeting para orolayan an problema.

Si Punong Barangay Jesse Batalla nagpaguiromdom sa mga residentes kan lugar na pakalakagaan an saindang iniinom na tubig, mientras na pig-iisi pa kan pig guikanan kan problema.

Saro sa mga pasyente na dinara sa St. John Hospital sa Naga City an sinabihan kan doctor na an saiyang helang amoebiasis.

Alagad, an iba, nagsusupecha na an naglakop na helang, gastroenteritis.

Mayo pa nin malinaw na informasyon kun ano talaga an helang na ini.

Hasta sa sinusurat an baretang ini, kadakul pang mga tawo an afectado kan problema.

Sabi sa listahan kan MHO, an dinara sa sainda na mga paciente kadaklan an edad poon 3 hasta 12 anyos.

Pero, naisihan  kan BICOL STANDARD na pati mga estudiante sa Villamayor High School an nag rereclamo kan siring na kamatean. (BICOLSTANDARD.COM)
Share:

SPECIAL OFFER

SPECIAL OFFER

Featured Post

PDIC takes over Goa bank

Rural Bank of Goa Photo: PDIC MANILA— The Monetary Board (MB) of the Bangko Sentral ng Pilipinas (BSP) prohibited Rural Bank of Goa (...