Sunday, March 22, 2015

MARIKAS NA PARAHABAS | 2ng holdup sa laog nin 10 minutos

TABACO CITY—Sa pag-oltanan sana nin 10 minutos an suspechadong pusikit na parahabas  nakabiktima tulos nin duwang residentes kan ciudad na ini.

Susug sa record kan hepatura kan pulis, bandang alas 7:40 nin bangui sa P-4, Divino Rostro, harane sa may La Funeraria Funeral parlor, inagaw kan suspechado na si Marcial Bufi Bueno, an Android cellular phone ni Jonathan B. Bancosta na an kantidad P8,000.

Sabi kan victima nahulog pa sa tinampo an saiyang cellphone kan gabringon ini ni Bueno, kasabay kan saiyang armas na kutsilyo na saiyang nabutasan kan pangyayari.

Alagad, dae siya nakalaban ta madaling napurot kan suspechado an patarom na iyong itinutok saka, dangan duminolag, dara an saiyang cellphone pasiring sa direksyon kan Barangay Sto. Cristo digdi.

Pag alas 7:50, o pirang minutos sana kan mangyari an enot na pang-agaw nin cellphone, an pareyong suspechado an nabiktima na naman si Robelyn Bonto Bellen, na kan panahon na ito naglalakaw asin saiyang amiga na si Donis Brillantes sa may Casa Eugenia Hotel, hale sa centro kan ciudad.

Siring kan dati, ginabring kan suspechado an saiyang bag asin nagburokodan na sinda pasiring sa dike sa Barangay Sto. Cristo.

Alagad, an victima dae na nagpadagos kan saiyang paglapag kan naheling niya na nagbunot nin nagsisilyab na kutsilyo an suspechado hale sa saiyang eksan.

Arog kan enot, nagdulag an suspechado pasiring sa barangay San Roque digdi.

An laog kan bag kan victima iyo an saiyang SSS ID, P3,500 na cash, itom na Samsung Duos na cellphone na kantidad P5,000, sarong itom na Cherry Mobile na kantidad P3,000 asin itom asin lilang color na Cherry Mobile na kantidad P1,000.

An suspechado madaling nabisto kan mga victima kan ipaheling sainda an mga retrato kan mga pusikit na parahabas digdi.

Hasta sa panahon na sinusurat an baretang ini dae pa natutuparan an suspechado sa nangyaring krimen.—BICOLSTANDARD.COM Pirmeng Enot. Pirmeng Bago.
Share:

Featured Post

VG Pimentel lobbies for CNorte hospital upgrade

Camarines Norte Provincial Hospital Photo via https://www.facebook.com/pages/Camarines-Norte-Provincial-Hospital/216874988337215 DAE...