Thursday, March 26, 2015

Manager, nadenggoy nin joven na masahista

CIUDAD NIN NAGA— Luma nang estilo, alagad bagong pangyayari an nakabugtak sa record kan pulis digdi, dapit sa sumbong nin sarong bank manager.

Nagreport siya sa pulis na siya navictima nin salisi sa laog kan sarong hotel digdi.

Si Jose de Dios (bakong tunay na pangaran) manager, 62 anyos, balo, nagparecord sa blotter kan pulis na nawaran siya nin cuarta sa laog kan cuarto sa sarong hotel.

An estorya kan manager, nagkua siya nin cuarto para makapahingalo kan saiyang kapagalan, huli sa maghapon na mga lakaw kan mga importanteng transaksyon sa bangko.

Masulnop an saldang kan maisipan niyang maglakaw-lakaw sa Plaza Rizal digdi, para maghanap nin pwedeng makaestoryahan ta mapungaw na maray an mag solo-solo.

Naheling niya si Naida, (dae aram an apelyedo) sarong babae na nakatindog sa limpoy nin kahoy sa atubangan kan Puregold Department  Store sa centro.

Dinulok niya an babae. Nagpabisto kan saiyang pangaran. Nagtukaw sindang duwa sa cementadong tukawan sa Plaza Rizal.

Pirang minutos sana, si de Dios, nagpaaram nang mabalik na sa hotel.

Hinagad kan babae an room number asin cell number kan manager.

Dae naghaloy, nagbalik na siya sa cuarto. Pero nagsunod saiya si Naida.

Sabi sa blotter, nag oofrecir si Naida na magmasahe sa pagal na hawak kan manager.

Nagtugot an gurang. Alagad may condisyon na an bayad sa babae na mamasahe P250 sana.

Idinagdag sa reclamo, na sinabihan siya ni Naida na kun “all the way,” may masahe na, may extra pa, an bayad P700 na.

Tugot an manager.

Digdi nagpoon an problema ta nagsabi si Naida na antes siya magmasahe, dapat magshower ngona si de Dios.

Kan maglaog sa banyo si de Dios asin nag wawagas-was na an shower, linalay ni Naida suboot an pitaka asin ibang gamit. Marikas siyang nagdulag.

Huri na an gabos kan magprobar siyang lapagon si Naida ta na sigyapot siya sa cama asin nahaloy sa pagsulot kan saiyang pantalon.

Nakadulag an suspechado, dara an gabos niyang cuarta.

An sabi kan manager, an nawara saiyang cuarta kantidad P15,000 na an kagsadire an kumpanya na pigtatrabahohan niya.

Kasoodma, si Jose de Dios nagparecord kan incidente sa pulis digdi.

Alagad an patrolman na nagsusurat kan blotter, naghuhuyom-huyom sa nangyari sa manager.
An suspecha, nadenggoy sana siya kan babae.—ni Boyet Paderes BICOLSTANDARD.COM
Share:

SPECIAL OFFER

SPECIAL OFFER

Featured Post

DAET GARBAGE ISSUE | Sarion blames Ochoa; Ochoa to request for state audit of funds

Former Mayor Tito Sarion (left), incumbent Mayor Benito Ochoa (right) DAET, Camarines Norte—“The ball is now in the hands of the new ...