Thursday, March 5, 2015

‘Maisog’ na maestra, pinipetisyon pahalion

RAGAY, CSur— Labi an isog sa mga kaakian.

Ini an reklamo kan nagkapirang mga magurang sa San Rafael Primary School sa banwaan na ini kontra sa Head Teacher na si Lilian Vasquez, na saindang ipinepetisyon na pahaleon sa eskwelahan asin sipaon na sa pagiging maestra.

Sa pahayag ni Remar Toralexa, an Parents-Teachers Association (PTA) President na iyo an nagkokolekta kan mga pirma, dakol nang eskwela an nagsumbong na suboot kinukulgan sinda kan nasambit na maestra.

Igwa na suboot ining pinakakan nin papel, sinampaling, hinubaan, tinulod sa fishpond, asin iba pal. Alagad an kadaklan sa mga magurang kan mga eskwela, mayong kusog-boot na magplantear nin reklamo.

Kan fecha 19 pa sana kan Pebrero, segun ki Toralexa, igwa na naman nin sarong eskwela na nagsumbong.

Sa pahayag kan 15 anyos na eskwela, linaog kan maestra an saiyang residensya mantang naglalaba an daragita.

Kinurahawan siya suboot kan maestra na “Ano an pigpaparasabi mo na ampon an aki ko?”

Dangan tinulod, sinampaling, asin sinikadan suboot an daragita, na tulos man nanlaban.

Kinamros kaini an maestra mantang siya suboot tinitilok.

Nin huli sa pangyayari, planong kasuhan kan eskwela an maestra sa pagbalgar kan derecho kan mga kaakian na yaon sa Republic Act 7160.

An victima ipinasairarom na kan saiyang magurang sa medical test asin nagreklamo sa pulis.
Mientrastanto, napag-araman kan Public School District Supervisor (PSDS) kan banwaan na ini na si Joselito Mendez an insidente.

Kinaulay ni Mendez an maestra, an PTA President, an biktima, asin an ina kaini.

Boot kuta ni Mendez na maghagad na sanang tawad an maestrang si Vasquez sa aki asin sa magurang kaini. Alagad, pinanindugan kan maestra na mayo siya nin kasalan asin pinahimutikan an mga alegasyon nin pangungulog.

Sa oras na sinusurat an baretang ini, padagos pa an pagtipon nin mga pirma sa petisyon na ipaplantear kontra ki Vasquez sa Division Office kan Department of Education (DepEd) na suboot pwede maging basehan sa pagpahale sa maestra.—Report ni Jener Villarez, BICOLSTANDARD.COM
Share:

Featured Post

VG Pimentel lobbies for CNorte hospital upgrade

Camarines Norte Provincial Hospital Photo via https://www.facebook.com/pages/Camarines-Norte-Provincial-Hospital/216874988337215 DAE...