'Not guilty' an simbag kan mag-agom na Osabal sa casong Murder

NAGA CITY –“Not guilty.” Ini an simbag ni Jufre "Jo" Osabal asin an saiyang agom na si Juvy, kan binasahan nin demanda sa Regional Trial Court (RTC) digdi.issu

An mag-agom na Osabal pareyong akusado nin pang gadan (Murder) sa sala ni Judge Valentin Pura kan Branch 23 kan RTC sa Naga.

An victima sa nasambit na krimen iyo si Raul Matamorosa, alkalde kan Lupi, Camarines Sur, na binadil, gadan, mantang yaon sa Diversion Road, sa Barangay  Triangulo kan taon 2013.

Pakatapos kan “arraignment” o pagbasa kan demanda,  sa mosyon kan abogado kan victima, hinagad ni Atty. Noe Botor na ilipat nin prisohan an mga akusado paghale sa Tinangis Penal Farm pasiring sa District Jail sa Naga City.

Sabi kan abogado ni Matamorosa na si Atty. Noe Botor, dapat ibalyo an mga akusado sa District Jail ta duman sa Tinangis Penal Farm, na kun saen sinda nakukulong, garo na sana si estorya na inapon si bao-o (turtle) sa tubig.

An mga Osabal, sa dugang na paliwanag ni Atty. Botor, midbid na dayupot na ka-alyado sa politika kan nakatukaw na gobernador, kaya pwede suboot na bakong parehas an tratamiento sainda asin an ibang mga nakakulong.

An gobernador, sa lindong kan ley, iyo an pamayo asin namamahala kan Provincial Jail.

Mientrastanto, sa isyu kan kahagadan na makafiansa an mga akusado, itinalaan kan jusgado an surunod na mga fecha para dangogon an mga evidencia kan prosecution, para probaran na makusog an evidencia contra sa mga inaakusar.

An RTC Branch 23 nagtalaan kan mga bista sa Petition for Bail sa Marso 24, 26, 27, 30, 31 asin sa Abril 6, 2015.

An mga testigo na ihahampang kan prosecution iyo sinda Maria Concepcion Matamorosa, Eric Baluyo, Cesar Archi, Justin Vinas, asin Juanito “Totoy” Ona.


Si Ona yaon ngonian nagseserve nin sentencia sa National Bilibid Prison duman sa Muntinlupa. – ni Boyet Paderes, BICOLSTANDARD.COM

Start typing and press Enter to search