Friday, March 6, 2015

CASURECO III nangangapudan na nin ayuda sa pribadong sector

IRIGA CITY—Ibiniklad na kan Camarines Sur III Electric Cooperative (CASURECO III) an mga kasakitan na kinakahampang kan manehamiento.

Ini saindang ipinahayag sa ginibong Stakeholders Consultative Meeting kan manlaen-laen na sector asin ahensya gikan sa mga banwaan sa Rinconada sa University of Saint Anthony (USANT) Audio Visual Room kasoodmang hapon.

An tolong problema iyo an mga kautangan na lampas na sa kakayahang bayadan, receivables na gikan sa mga consumidores, asin an systems loss.

Ini an tolong dahilan kun tano uminabot na sa 1.2 billion pesos an kautangan kan cooperatiba sa mga supplier asin iba pang mga ahensya.

Sabi pa kan manehamiento, igwa sinda nin walong opsyon na puede ser makaresolba sa mga inaatubang na problema.

An mga ini iyo an pinag-aapod na joint venture, investment management contract, management contract, operation and maintenance contract, special equipment and material lease agreement, concession agreement, merger, asin consolidation.

Alagad, an walong opsyon na ini pinagdudahan kan mga nag-atendir ta an mga ini suboot bakong solusyon sa problema.

Kadakol man sa mga nag-atendir an nagtao nin mga suhestyon.

Kaiba na digdi sinda Atty. Santiago Ortega, an president kan USANT, na interesado na makipagcompetensya sa CASURECO III sa servicio kan kuryente.

Mientrastanto, an joven na negociante na si Solomon Ngo, nagtao man kan suhestiyon na cooperative o full government takeover.

Si Alcalde Rey Lacoste kan Buhi nagsabi man na pwedeng an LGU an magibo nin temporaryong paagui sa pag-garantiya sa mga supplier.

Nagkontra man sa pagsasapribado kan cooperatiba an iba pang mga personalidad na nag-atender.

Inako kan manehamiento kan CASURECO III na an problema garo na helang na kanser na mayo nan in bulong.

An orolay lalong naging tensyonado ta an San Miguel Energy Corporation (SMEC) dai na nagtogot na dai na mabayadan an kautangan kan cooperatiba hasta sa Lunes, fecha 9 kan Marso.

An SMEC nagpahayag na na puputulan nin kuryente an CASURECO III sa fechang nasambit.


Katakod pa kaini, maski an National Electrification Administration (NEA), nagsabi na dai na kaini kayang asumiron an problema, ta igwa pa ngani nin utang sainda an CASURECO III.—Report ni Jun Oyales, BBS-DWLV
Share:

SPECIAL OFFER

SPECIAL OFFER

Featured Post

PDIC takes over Goa bank

Rural Bank of Goa Photo: PDIC MANILA— The Monetary Board (MB) of the Bangko Sentral ng Pilipinas (BSP) prohibited Rural Bank of Goa (...