Bokal Abonal, dae guiraray pinatukaw kan Sangguniang Panlalawigan

PILI- CSur – Inolang na naman kan mga miembros kan Sangguniang Panlalawigan an pagtukaw sa pwesto kan 2ng mga bagong miembro kan Sangguniang Panlalawigan, na ipigproklamar na gana sa election kan 2013.

Durante kan ginibong session kasubagong odto, an SP nag declarar na dae pa ninda pwedeng akoon si Atty. Ariel Abonal bilang miembro kan SP na minarepresentar kan segundo distrito kan Camarines Sur, ta igwa pa nin pendienteng Petition for Certiorari sa Supreme Court si dating bokal Romulo Hernandez.

Si Hernandez enot nang pig disclalificar kan Commission on Elections, en banc bilang bokal kan segundo distrito, sa rason nan aka tulong beses na siyang naelihir pareyong pwesto.

Mientrastanto, sa session kasubago, si 1st District Board Member Warren Senar, sa saiyang pag contra sa pag asumir sa pwesto ni Abonal nag sabi na mahalat sinda kan masunod na mga desisyon sa pendienteng kwestyon legal.

En connection kan bagay na ini, sinabi ni Abonal na nagpasaluib opisina kan junta provincial sa pagtalaan kan session ngonian na aldaw.

Segun saiya, kan Viernes nag hapot siya kun mag session ngonian na semana, alagad dae nagtuga saiya na igwa nin session.

An regular na session kan junta provincial ginigibo kada Martes.

Alagad ngonian na semana, sa rason na bakong malinaw ki Abonal, inabante an session ngonian na aldaw, Lunes, en vez na Martes.

Yaon ngonian si Abonal sa Supreme Court tanganing mag sumitir kan dugang na mga commentaryo na kaipohan para sa saiyang pagtukaw sa pwesto.

Maboot na sinabi ni Abonal na maabot man lang sa tamang panahon na mayo nang ikakataong rason an mga kalaban niya sa politikang mga bokal, asin siya makakatukaw man guiraray. Ni Oscar Esmenda (BICOLSTANDARD.COM)

Start typing and press Enter to search