3ng para barbecue, hinoldup

DARAGA, Albay—Ultimong an mga paratinda nin barbecue sa Barangay Penafrancia sa banwaan na ini an dae pinatawad kan mga holdapers sa pinakabagong hornada nin krimen.

Sabi sa report kan pulis, sinda Renea Manago y Napay, may agom; an saiyang live-in partner na si Frederich Llames y Loria asin si Sarah Jane Luces y Negrete an anas naging victima kan dae midbid na duwa na naghabas kan saindang benta sa tindahan nin barbecue.

An mga awtoridad na nagconducir nin pagsaiyasat nagpahayag na an mga para-barbecue dinulok kan sarong lalaki, huna ninda mabakal nin merindalan.

Alagad marikas na maray si pangyayari kan an lalaki magdeclarar nin “Wag kamong gagalaw,” dagos nagtutok kan saiyang bronzing replica na revolver sa mga nasustohan na mga paratinda.

Enot na pig himunta kan kawatan man sana nganing badil-badil iyo si Sarah Jane na sinabihan na “ilabas ang kwarta.”

An suspechado naheling kan mga victima na nagtatakigtakig an kamot mantang pig hihimonta kan puro kan armas an mga paratinda. Dangan, kiniblit kan suspechado an badil. Pero, dae nagputok na bako man talagang totoong badil an saiyang gamit.

Maski pa siring, an holdaper nakakua pa guiraray nin sarong garapon na mga dulceng chocolate asin nagkapirang sincillo, na an kabilogan na kantidad P160.00 man sana.

Pakatapos na ilaog sa bulsa an cuarta asin kugos an sarong garapon na dulceng chocolate, marikas na nagkutipas padulag an bagitong para holdup.

Si PO3 Frank Paul M. Bobis asin PO3 Mark Gil M. Victorioa iyo an mga natukahan na mag-imbistigar kan casong ini.

Hasta sa oras na sinusurat an bareta, dae pa isi an pangaran kan suspechado. — BICOLSTANDARD.COM Pirmeng Enot. Pirmeng Bago.

Start typing and press Enter to search