Monday, February 9, 2015

Nakumpiskar na mga sachet ki Kap, positibo sa shabu

VIGA, Catanduanes—Positibo sa shabu.

Ini an nagluwas sa confirmatory test na ginibo kan mga awtoridad digdi sa kemikal na nakalaag sa mga sachet asin drug paraphernalia na nakumpiskar sa kapitan kan sarong barangay digdi.
Binisto ini kan pulis an suspechado na si Martin Camatoy y Tulalian, alyas “Atin”, 48 anyos, may agom, residente asin punong barangay kan Barangay Roxas,  banwaang ini.

Nakumpiskar na mga sachet kay kap, positibo sa shabu
Retrato kan Oplan Droga
Inaresto si Camatoy kan Pebrero 3 pagkatapos siyang makuanan nin mga pigtutubudan na droga kan pig-implementar kan mga elemento kan Viga Municipal Police Station asin San Miguel Police Station an sarong search warrant na nakapangaran saiya.

An search warrant numero 2015-8 pinaluwas ni Hon. Lelu P. Contreras, Executive Judge kan RTC Virac kan Enero 27.

Mismong si Acting Chief of Police  PSI Edgar Ebuenga Azotea kan Vigan MPS an nangenot sa pagpaotob kan mandamiento kan husgado.

Testigo sa ginibong operasyon an mga minasunod: Janelyn Rima – representante kan media, Rudy Templonuevo – representate kan Department of Justice, asin mga konsehal kan barangay na sinda Domingo T. Publico and Ricky T. Olesco.

Sa kopya kan progress report na tinao sa BICOL STANDARD, sinabing enterong nagpositibo sa presensiya kan methamphetamine hydrochloride o shabu an tolong pedasong plastic sachet na may laog nin crystalline granules. An mga sachet pigmarkahan na JLT -1 8:06 PM, JLT-8A 8:30 PM asin JLT-8B 8:30 PM kan an mga ini nakumpiskar.

An tolong sachet may gabat na  0.251 gramo, 0.242 gramo, asin 0.233 gramo. Gabos-gabos, 0.726 gramo an gabat kan mga ini.

Pati si tootoer na nakua, nagpositibo man sa droga.

Huli kan pagpositibo kan mga resulta, nagsangat na nin nagkapirang reklamo nin pagbalgar kan Sec. 11 (Possession of Illegal Drugs), Sec. 12. (Possession of drug paraphernalia) asin Sec. 6 (Maintenance of Drug)  kan R.A. 9165 o ( Comprehensive Dangerous Drug Act of 2002) an Viga MPS sa Oficina kan Provincial Prosecutors kan Virac sa paagi nin inquest proceedings.

An mga ini may docket numbers na NPS NR. V-II-INQ-15B-00022, NPS NR. V-II- INQ-15B-00023 asin NR. V-II.- INQ-15B-00024.


Presenteng detenido an punong barangay sa Viga MPS mientras nag-aandar an imbestigasyon kan oficina kan provincial prosecutor.—BICOLSTANDARD.COM
Share:

SPECIAL OFFER

SPECIAL OFFER

Featured Post

Sorsogon mayor, 2 others charged in Sandiganbayan

SORSOGON CITY 5/23/17 (Bicol Standard) -- Ombudsman Conchita Carpio-Morales has recommended the filing of criminal charges against Bu...