Wednesday, February 25, 2015

Solterong bangag sa droga, pinasa an payo kan saiyang ama

GUINOBATAN, Albay – Parricide an pangaran kan casong aatubangon ni Jomari Acabado y Mirasol na iyo an responsable sa pag-utas kan buhay kan saiyang ama sa krimen na nangyari sa laog mismo kan saindang harong sa Barangay Agpay, digdi.

Basado sa imbestigasyon kan pulis, an suspechado posibleng nasa influencia nin pinapangalad na bulog kan saiyang pagparabagohon an pandok (lalawgon), asin payo kan saiyang ama na an gamit na armas “cabra” (crow bar).

An victima pigbistong si Rodolfo Acabado, 60 anyos an edad.

Sabi sa ginibong pagsiyasat kan mga pulis digdi sa pamamayo ni Sr. Insp Luke Ventura, antes mangyari an krimen, nagkaigwa ngona nin mainit na diskusyon an mag ama.

Nagluluwas sa imbestigasyon na an suspechado duwang bulan pa sanang nagbwelta sa saindang barangay hale sa pirang taon na pagtrabaho sa Batangas.

An sabi, nariparo na kan saiyang mga magurang an ibang hiro-hiro kan suspechado asin haros dae ngani nakakaolay nin toltol.

Nagdecider an mga magurang kan suspechado na ipaheling siya sa rehabilitation center sa pagtubod na igwa siya nin problema sa pag gamit nin droga.

Kan panahon na ini, naheling kan saiyang mga magurang na nagkua an suspechado nin “cabra,” na iyong orog pang nagdara nin kahaditan sa saiyang magurang. Para maka-iwas sa pwedeng mangyaring remalaso, kinua kan ama an armas na “cabra.”

Huli kan ginibo kan ama, nag-init nang entero an payo kan suspechado asin nagpoon nang magbalinghaw.

Sa enot pa sanang rapado kan “cabra” nagtiwis na tulos an dugo sa payo kan magurang. Sinundan pa ini nin surunod na humbal sa lalawgon, asin pirang beses pang liwat pinusakan an payo kan armas.

Dae pa nakontento sa naronot na nganing payo kan ama, an suspechado nagbunot pa nin kutsillo asin dakulon pang beses na pigpara saksak sa lawas an ama, na haros mgkapiridaso na an lawas.

Nagpondo sana an pagbalinghaw kan suspechado kan mag-abot na an saiyang ina asin an saiyang mga tugang.

An suspechado ginarapos kan saiyang mga tugang asin dinara sa hepatura kan pulis.

Sasangatan siyang casong Parricide, huli sa nasambit na krimen.–BICOLSTANDARD.COM
Share:

Featured Post

Celebrating creation: Guibo Mi Yan pop-up art fair in Naga City

Guibo Mi Yan pop-up art fair in Naga City by Melissa Villa-Real Basmayor The declaration of the name of the pop-up art fair Guibo Mi...