Wednesday, February 11, 2015

‘Bagita’, 12, kinasuhan an BF nin Child Abuse

ni Boyet Paderes

NAGA CITY—Nagngongorob-ngorob asin naghihinanakit.
Ini an sentimiento na gustong ipamate ni Jesse de las Llagas sa saiyang namomotan na iyo man lang nagreclamo tanganing siya kasohan nin pagbalga sa Republic Act 7610 na mas bisto sa apod na Child Abuse.
Nagpoon an saindang relasyon sa paagi nin pagriribayan nin mga mensahe sa text.
Mga mahahamis na mensahe na iyong nagtulak sa saindang duwa na mag “eyeball” sa sarong lugar sa centro kan Naga.
Marikas si mga pangyayari kaya nagimata na lang si de las Llagas na kataid na niya sa higdaan si Elsie (bakong tunay na pangaran) asin nangyari na an dae pa dapat mangyari kun dae pa minaako nin matrimonyo.
Huri na kan maaraman ni de las Llagas na nagsumbong palan si Elsie sa saiyang mga magurang kan nangyayari sa sainda.
An dae daa aram kan lalaki na an saiyang katrato menor de edad pa, 12 anyos pa sana, asin bakong 18 anyos na iyong declarasyon sa saiya.
Ipigreclamo si de las Llagas sa pulis. Ngonian nag-aatubang siya nin caso sa pagbalga kan Sec 5 kan RA 7610, asin igwa nin mandamiento de aresto hale sa Regional Trial Court.
Mantang yaon sa hepatura kan pulis an akusado, nagkukurahaw nin justicia an lalaki asin nagmamawot na panindogan ni Elsie an saindang sumpaan.
Mientrastanto, sabi sa mandamiento de aresto, si de las Llagas pwede sanang makaluwas sa carcel kun mahimo niyang makafianza nin kantidad P80,000.
An nagrereclamo taga-Taculod, Canaman, mantang an suspechado taga Pacol, digdi.—BICOLSTANDARD.COM
Share:

Featured Post

Celebrating creation: Guibo Mi Yan pop-up art fair in Naga City

Guibo Mi Yan pop-up art fair in Naga City by Melissa Villa-Real Basmayor The declaration of the name of the pop-up art fair Guibo Mi...