Friday, February 13, 2015

Babaeng mapagayun, napakanos

NAGA CITY –Mapaparlor kamo para sa Valentine? Uya an sarong pagamiaw.
Masangat nin reclamo an sarong 21 anyos na daraga contra sa may sadire kan parlor na nag “rebond” kan saiyang buhok kan naka-aging bulan.



An casong ipaplantiar Reckless Imprudence Resulting in Physical Injuries, sabi sa blotter kan Naga City Police Office, NCPO, digdi.

An nagreclamo sarong Alma (bakong tunay na pangaran) na taga-Dona Ramaida Village, Concepcion Grande.

Sabi ni Alma, kan fecha 6, ngonian na bulan, nagtuyo siya sa Amy’s Beauty Parlor na yaon sa Ground Floor kan Naga City People’s Mall tanganing ipatanos an saiyang nagkukurong na buhok.
Hinagadan siya nin bayad na kantidad P350.

Alagad, sa pagpakarhay kan saiyang buhok, linahidan kan beautician nin dae niya aram na likido na namate niyang nagresulta sa paggatol asin pagharitihit kan anit kan saiyang payo.

Sabi ni Alma, nagreclamo tulos siya sa namatean na pag hibot-hibot kan anit kan saiyang payo na garong pigbabarinahan an saiyang sentido.

Dae lang siya pig-intindi kan kagsadire kan parlor maski pa rilitid na an saiyang ugat sa liog na nakikimaherak na nagrereklamo kan namamatean.

An sabi sana kan kagsadire kan parlor na hugasan nin tubig tanganing mahale an haldat.
Pirang aldaw an nakalihis dae na niya matios an kamugtakan.

Kasuodma, si Alma nagkeha na sa pulis asin nagpatanid na masangat nin caso contra sa parlor.
Naheling kan reporter na si Boyet Paderes na napalnitan na an payo kan babayi.

An saiyang payo nagdudunig na huli sa mga liptok na efekto kan likido na ipinahid.

Mientrastanto mayo pa nin pahayag an kagsadire kan Amy’s Beauty Parlor sagkod sa oras na sinusurat an baretang ini. –ni Boyet Paderes BICOLSTANDARD.COM
Share:

SPECIAL OFFER

SPECIAL OFFER

Featured Post

PDIC takes over Goa bank

Rural Bank of Goa Photo: PDIC MANILA— The Monetary Board (MB) of the Bangko Sentral ng Pilipinas (BSP) prohibited Rural Bank of Goa (...