Wednesday, February 25, 2015

Babaeng kinagat nin sungal, nagreklamo

NAGA CITY—“Kaipohan ko pong magpa-injection nin anti-rabies ta kinagat ako nin tawo?”
Babaeng kinagat nin sungal, nagreklamo
Ini an hapot kan nagngongoy-ngoy na si Anselma (bakong tunay na pangaran) sa sarong reporter kan radyo kan sarong aldaw.
An keha nakaabot sa pulis ta sabi, enot inatraka ni Anselma si Daday (bakong tunay na pangaran) sa saindang residencia sa Sitio Iwid-iwid, Cararayan, digdi.  An causa kan iwal, mga tsismis.
Si Daday iyo an itinutokdo ni Anselma na nagwarak nin mga pakaraot saiya.
Huli kaini nagguromolan asin naggurunitan sinda.
Mayong nakasaway. Nag-orog an iwal.
Dangan, inokoban nin kagat ni  Anselma si Daday.
An pigreklamo ni Anselma iyo an dakul na guira kan mga kagat ni Daday.
Sabi niya dakulon siyang kinagatan na naghuhotong sa kulog hasta ngonian.
“Dae ko kayang tioson an kulog ta hararom an tadom kan mga ngipon niya,” sabi ni Anselma.
Sinabi kan complainant sa imbestigador,  kaya siya na-grabe ta sungal an duwang ngipon kan saiyang kaiwal.
Haros nalukab an saiyang laman huli sa kagat kan matarom na mga ngipon ni Daday.
May pagduda si Anselma na pwedeng na-infection pa an mga kinagatan ta maati an ngipon ni Daday. Mientrastanto, pwedeng kasohan nin Physical Injuries si Daday.
Hinahalat na sana an resulta kan imbestigasyon kun idadagos an reklamo.
Sa ibong na lado, si Anselma iibahan ngona sa Bicol Medical Center (BMC) kan reporter para  magconsulta kun dapat siyang tudokan nin anti-rabies.
Sagkod ngonian padagos siyang kinukolog asin maduso an mga kinagatan.—ni Boyet Paderes, BICOLSTANDARD.COM
Share:

Featured Post

Naga City shabu dealer slapped with life term

NAGA CITY 11/22/17 (Bicol Standard) -- A man caught selling Php200,000.00 worth of shabu inside a room of Villa Caceres Hotel in 2015 w...