Bicol newspaper | Bicol Standard | Get Bicol news about the Bicol region: Naga City, Camarines Sur, Albay, Legazpi City, Masbate, Sorsogon, Camarines Norte and Catanduanes.

Wednesday, January 14, 2015

PNP Bicol mas agresibo kan 2014

LEGAZPI CITY—Nagbunga na an mas pinaisog na kampanya kontra sa kriminalidad kan Police Regional Office 5 (PRO5).

Police Chief Supt. Victor Deona
Police Chief Supt. Victor Deona
(Photo by Oscar Esmenda/BICOLSTANDARD.COM)
Sa pinakabagong Comparative Operational Accomplishment, nagluwas na an numero kan mga nadakop na nagbalgar sa ley sa pagultanan kan Enero hasta Diciembre 2014, luminangkaw na marhay kun icocomparar sa bilang kan 2013 sa manlaen-laen na ley na pigcoconcentraran kan pulis.

Kabali digdi an mga ley sa ilegal na droga, ilegal na sugal, ilegal na pagdakop nin sira, ilegal na pagputol nin kahoy, loose firearms, asin pagdakop kan mga wanted na persona.

Sa loose firearms, pinakadakol na nakarecord na nadakop kan Camarines Sur Provincial Police Office, na igwa nin 170.

An nasambit na provincial police office iyo man an may pinakadakol na nadakop na naglapas sa ley sa ilegal na droga, ilegal na pagputol nin kahoy, asin mga wanted na persona.

Mientrastanto, an Albay primero sa lista kan may pinakadakol na na-aprehender sa ilegal na pagsira.

Sa enterong 2014, 546 an nairecord na nagbalgar sa ley contra sa loose firearms, 798 sa illegal drugs, 1068 sa illegal gambling, 2027 sa illegal fishing, 857 sa illegal logging, asin 3850 sa arrest of wanted persons.

Sakop kan Police Regional Office 5 an Provincial Police Office kan Albay, Camarines Norte, Camarines Sur, Catanduanes, Masbate, Sorsogon, asin an City Police Office kan Naga.

Maroromdoman na poon kan magtukaw si Police Chief Supt. Victor Deona kan huring parte kan 2013, nagpatanid ini na bawal an hugakon na pulis sa PRO5.

Ipigtogdas ni Deona an target output system, na nag-encaminar sa mga pulis na magin mahigos sa pagsirbe sa mga namamanwaan.

Sa lindong kan sistemang ini, an mga Chiefs of Police na dai nakakomple sa hinahagad na numero nin mga pag-aresto, pinapasairarom sa retraining.—BICOLSTANDARD.COM

PNP Bicol Comparative Operational Accomplishment
PNP Bicol Comparative Operational Accomplishment
Share:

Featured Post

Advantages and disadvantages of mother tongue-based education

Photo: Naga Smiles to the World by Shiela S. Ronquillo Del Gallego Central, Del Gallego District Since School Year (SY) 2012-2013,...