Mariribok na night club, videoke bar sa Ciudad nin Naga, mumultahan

NAGA CITY—Bawal istorbohon an katrankiluhan kan kabanggihan sa maogmang lugar.

Ini an pagiromdom kan City Legal Office sa mga maysadiri nin night club, cabaret, videoke bar, bar, disco, asin iba pang mga kaparehong mga estabicimiento sa sarong tiripon kan fecha 12 kan Enero.

An nasambit na mensahe ipinaabot sa tahaw kan mga reklamo na naresibe kan LGU Naga hali mga residente na pongot sa abang riribok na lugar nin kaogmahan sa tahaw kan kabanggihan.

Sa paagi nin sarong surat, naghagad nin ayuda si City Legal Officer Atty. Perfecto Junjun Bragais III ki Gregoria Nilda B. Abonal, Acting City Treasurer kan City Treasurer’s Office na ibalangibog an pagiromdom sa mga negociante.

Sabi sa surat, sa Section 8 kan City Ordinance No. 2008-053, ipinapangalad sa mga maysadiri nin harong o estabicimiento an paggamit kan mga amplifier sa mga videoke machine, radyo, mga instrument, combo, orchestra, o public address system sa luwas kan edificio.

Multa na P2,000 an babayadan kan madadakop sa primerong beses, P3,000 sa ikaduwang beses, asin P5,000 o pagkakarsel sa laog nin 45 sundo 60 na aldaw, o pareho, depende sa desisyon kan korte.

Mientrastanto, an Section 3 (a) asin (d) kan City Ordinance No. 2004-109 nagmamanda sa mga maysadiri o nagpapadalagan nin mga videoke bar na maglaag nin sound-proofing materials.

Idinugang pa sa nasambit na City Ordinance na ipinapangalad an pagpabakal o pagsirve nin ano man na alak sa mga menor de edad sa elementary, high school o college sa gabos na oras.

An pagbalgar sa nasambit na City Ordinance igwang penalidad na multa nin P1,000 sa enot na pagkadakop, P2,000 sa ikaduwang pagkadakop, asin P3,000 sa ikatolong pagkadakop.

Kun maapatan na beses an pagkadakop sa naglapas kan nasambit na ley, papanimbagon siya nin multa na P4,000 o pagkakarsel sa laog nin dai malabi sa 30ng aldaw, o pareho, depende sa jusgado.

Afuera kaini, kakanselaron pa an saiyang Mayor’s permit.BICOLSTANDARD.COM

Start typing and press Enter to search