Bicol newspaper | Bicol Standard | Get Bicol news about the Bicol region: Naga City, Camarines Sur, Albay, Legazpi City, Masbate, Sorsogon, Camarines Norte and Catanduanes.

Monday, November 3, 2014

Lolo asin Lola na naglaog sa bawal na relasyon, arestado




CARCELADONG PAGKAMOOT

SIPOCOT, Camarines Sur –Lipotok pero bawal na pagkaminorootan kan duwang gurang an pwedeng magtuklang sainda palaog sa carcel.
An duwang gurang, maski may mga makuapo na, dae napugolan an makuring init kan saindang mga daghan, kaya nakalabonog sa casong kriminal.
Pinangaranan kan pulis an mga akusado na iyo sinda Ruben Custodio y Balane, 67 anyos asin si Eden Bongalon y Corres, 57 anyos an edad.
Dinakop sinda asin ikinonkon sa carcel por medio kan mandamiento de aresto.
Kasong pagsambay o concubinage an isinangat contra sainda kan lehitimong agom, na dadangogon sa sala ni Judge Jose P. Ventajar, kan Municipal Trial Court kan Sipocot-Lupi, Camarines Sur.
An sabi sa report, si Custodio may tunay na familia mantang si Bungalon, byuda.
An reclamo contra sainda pinagmarhay na bistahan kan jusgado, huli sa alegasyon na nag-eestar na sinda sa sarong harong bilang magkasaroan, mantang an lalaki may tunay na familia.
Pigpapangalad kan Codigo Penal kan Pilipinas na an sarong may-agom na lalaki magmantinir nin kasaroan o sambay sa saindang harong o makidurog sa escandalosong paagi sa babae na bako man niya tunay na agom. Ini pigcacastigo sa lindong kan Article 334 kan Revised Penal Code.
An pag-arestar sa duwa pinangenotan ni SPO2 Victor Sanao kan Sipocot Municipal Police Station.
An cada saro sainda may recomendadong fianza an jusgado nin kantidad P8,000.
Kun mapatunayan na nagkasala sa casong ini, an lalaki may castigong prision correccional sa pag-oltanan kan minimum asin medium periods, asin an babae kakastigohon nin destierro.
An boot sabihon, an babae dae man ilalaog rehas na batbat, pero papangaladan siyang maglaog sa 25 kilometros na distancia hale sa lugar kan lalaki. (BICOLSTANDARD.COM)
Share:

Featured Post

Advantages and disadvantages of mother tongue-based education

Photo: Naga Smiles to the World by Shiela S. Ronquillo Del Gallego Central, Del Gallego District Since School Year (SY) 2012-2013,...