ISIPON, OSIPON: Babaeng banal, victima nin para-ikit sa simbahan

NAGA CITY—Tiklop an saiyang mga tuhod.

Nag-aarang sa Amang Kagurangnan nin kapatawadan.

Pirong an saiyang mga mata, mantang naghohorophorop asin nag sosolsol.

Si Lorna M., taga Marupit, Canaman, Camarines Sur inabot nin labing 20 minutos para marumpas an Santo Rosario.

Alagad, an saiyang mahuyong boot, dara kan saiyang kabanalan, naribayan nin pungot asin ka-anggotan kan maaraman na an saiyang darang bag, na may laog kan saiyang pansaod na cuarta, hinabon na palan.

An victima, segun sa report sa pulis naghagad nin tabang kan mga awtoridad na mamidbid an nag-salisi saiya.

Nagtutubod si Lorna M., na sa kadakol na mga kasabay niyang nangangadye sa simbahan, igwa nin nakaheling kan parahabon.

Sa enot na imbestigasyon, an pulis na nakihumapot sa ibang mga parasimba nakaguno nin osipon na may nagrani sa victima nin duwang tawo, an saro babae asin saro lalaki.

Pirang minutos suboot na pigmamasdan kan duwa, na pirming pirong an mata ni Lorna mantang nakikiolay sa Kagurangnan.

An marigmat na mga parahabon marikas na nagluwas sa simbahan, pagkatapos na magpanguros, paluwas sa pwerta sa atubangan, sabi kan nakaheling.

May mga parasimba sa San Francisco Church na nagsabi na pirang beses na ining nangyari. An parateng victima iyo an mga bagohan sa simbahan.


Mientrastanto, an mga awtoridad nagpapadagos pa sa saindang imbestigasyon, tanganing mahanap an parahabon.—Report ni Boyet Paderes, BICOL STANDARD

Bicol news | Albay news | Camarines Norte news | Camarines Sur news | Catanduanes news | Daet news | Iriga City news | Ligao City news | Masbate news |Masbate City news | Naga City news | Sorsogon news | Sorsogon City news | Tabaco City news | Virac news | Bicol Standard on Facebook | Bicol Standard on Youtube | Bicol Standard on Instagram | Bicol Standard on Google+ | Bicol Standard on Pinterest | Latest news in Bicol region | Bikol news | Bicol newspaper | 

Start typing and press Enter to search