Sunday, October 5, 2014

2ng nag sagin-sagin pulis, nadakopan plastic na badil-badil

SORSOGON CITY – Duwang lalaki na nagsagin-sagin na mga miembros kan Philippine National Police (PNP) an inarestar ni Barangay Kagawad Arnel Archinges mantang nagpapasaway sa sarong inoman sa Barangay Polvorista digdi.

An report kan pulis nagsasabi na an mga suspechadong sinda Romeo Lacdang de Vera, 28 anyos asin Joseph Apil Nolson, 21 anyos, taga barangay Bucalbucalan, sa ciudad na ini nagpasale sa laog kan Unica Hija Bar and Café.

Afuera kan Alarm and Scandal na ikakaso sainda, igwa pa nin duwa pang separadong asunto kriminal an isasangat kan mga awtoridad.

An saro digdi iyo an pagbalga kan BP 6, asin an saro, iyo an paglapas sa RA 10591, na mas midbid sa pag sukbit nin “replica" nin badil, sa sa biglang pagheling garo na tunay na badil.

Sabi sa imbestigasyon, sinda Romeo Lacdang asin Joseph Apil nagpabistong mga miembros kan PNP.

Narisa kan servidor kan bar na an saro sa mga suspechado ( Romeo Lacdang) may sukbit na lansitas sa saiyang habayan, kan ini pasiring sa comfort room.

Nagsumbong an waiter sa saiyang manager na si Arnel Anchinges, asin tulos pig disarmaran ini.

Mantang napupugolan ni Anchinges si Lacdang, nagdulok si Joseph Nasol, na may nakahukip na badil sa saiyang habayan.

Tulos nagpabisto siya bilang sarong pulis.

Sinugo ni Nasol si Anchinges na butasan si Lacdang.

Mientrastanto, sa nangyaring verificasyon, naisihan na bako man palan siyang pulis.

Maisog na inagaw ni Arnel Anchinges an nagbubokol na polo nin badil sa habayan ni Nasol. Sa saindang pag aragawan, nahulog an badil asin huli kan makusog na pag tama sa salog, nagkawarasak an mga parte kan plastic sana man palan na “badil-badil” na dara kan suspechado.

An mga awtoridad digdi nagsangat na nin mga caso contra sa mga suspehado, pagkatapos na paliwanagan sinda kan saindang derecho sa lindong kan Constitution.  BICOLSTANDARD.COM


Share:

SPECIAL OFFER

SPECIAL OFFER

Featured Post

Masbate's Villalobos Gang leader falls

MASBATE CITY 8/15/17 (Bicol Standard)--The alleged leader of Villalobos Gang, Ruel Villalobos y Amo, was neutralized in an anti-illegal...