Wednesday, September 24, 2014

Paratindang BBQ, binadil, gadan

SAN FERNANDO, Camarines Sur—Mayo pa nin pusog na informasyon an mga awtoridad sa banwaan na ini para mabisto asin madakop an responsable sa pagtapos kan buhay ki Dexter Brinas y Bagamasbad, 32 anyos na ginadan kan sarong aldaw.

Si Brinas sarong ordinaryong namamanwaan digdi, na an solamenteng hanapbuhay iyo an pagtinda nin barbecue.

An victima binadil nin dae namidbid na lalaki, gamit an calibre .45ng armas, poco mas o menos alas 7:30 nin banggui.

An sabi, an parabadil naglaog sa residencia kan victima, asin kan magkaigwa nin oportunidad, pinutokan an victima.

An bala hale sa calibre .45 tuminadom sa saiyang daghan, na iyong causa kan saiyang tulos na kagadanan.

Kan mangyari an incidente, pig-aragapan pa man kuta kan saiyang mga kataraid sa harong.

Alagad, kan makaabot sa Bicol Medical Center, sinabihan na sinda na mayo nang hinangos an victima, asin pirang minutos nang binawian nin buhay.

An sarong basehong capsula hale sa calibre .45 an nakua sa pinagyarihan kan krimen.

An nagpa-ikot kan isip kan mga imbestigador iyo an nadiscubreng an alkansya kan victima an nawawara, pagkatapos na mangyari an krimen.


An mga imbestigador pigbibilog pa ngonian an mga evidencia na pwedeng makatao sainda nin giya, sa pagresolver kan krimen.—BICOLSTANDARD.COM BICOL NEWS

Bicol news | Albay news | Camarines Norte news | Camarines Sur news | Catanduanes news | Daet news | Iriga City news | Ligao City news | Masbate news |Masbate City news | Naga City news | Sorsogon news | Sorsogon City news | Tabaco City news | Virac news | Bicol Standard on Facebook | Bicol Standard on Youtube | Bicol Standard on Instagram | Bicol Standard on Google+ | Bicol Standard on Pinterest | Latest news in Bicol region | Bikol news | Bicol newspaper | 
Share:

Featured Post

Daet ex-mayor convicted of malversation, graft charge

Former Daet, Camarines Norte Mayor Tito Sarion MANILA 10/12/17 (Bicol Standard) -- Former Daet, Camarines Norte Mayor Tito Sarion wa...