Lalaki tinadtad nin bala kan tanod sa Cabusao

CABUSAO, Camarines Sur—Lagbas nin 4 bala an hawak ni Enrico Candelaria kan siya badilon nin calibre 45 na tulos nagresulta kan saiyang kagadanan.

Nagluluwas sa imbestigasyon na an suspechado sa krimen iyo si Jhomar Llangco, sarong tanod sa Barangay Barcelonita sa banwaan na ini.

Sinitar suboot kan tanod an tugang kan victima, mantang yaon sinda sa Barangay Public Market. Ini nagresulta sa mainit na diskusyon.

Mantang nagkakainitan si Llangco asin an tugang kan victima, naka-agaw kan atensyon ni Enrico Candelaria an mga malalanit nang baralyohan nin tataramon, kaya nag-ansyas na ining  magsurog sa saiyang tugang.

Marikas si mga pangyayari asin huli sa grabeng diskusyon, orog pang na-anggot asin napikon si Llangco asin napamuransangan lugod na binadil si Enrico Candelaria.

An nagkakarigos na dugo na hawak kan victima dinara man tulos sa Bicol Sanitarium Hospital para mabulong.

Alagad, mayo na siya nin buhay kan makaabot sa hospital.

An suspechadong si Llangco 33 anyos, may agom, mantang an victima, 45, asin igwa man nin familia.

Nakua sa pinangyarihan kan krimen an 4 na baseyo nin bala hale sa calibre 45, duwang ilog (slugs) asin saro pang bala na dae pa pinapaputok.

Sagkod sa oras na sinusurat an baretang ini, mayo pa nin informasyon kun saen nagtago si Tiangco.
Siya pig hahanap kan mga awtoridad.

An sabi kan mga imbestigador, dara-dara pa kan suspechado an badil na saiyang ginamit sa paggadan ki Candelaria.—BICOLSTANDARD.COM BICOL NEWS

Bicol news | Albay news | Camarines Norte news | Camarines Sur news | Catanduanes news | Daet news | Iriga City news | Ligao City news | Masbate news |Masbate City news | Naga City news | Sorsogon news | Sorsogon City news | Tabaco City news | Virac news | Bicol Standard on Facebook | Bicol Standard on Youtube | Bicol Standard on Instagram | Bicol Standard on Google+ | Bicol Standard on Pinterest

Start typing and press Enter to search