Thursday, August 21, 2014

“Aswang,” nadakop sa Tabaco City

TABACO CITY—An dating ma-ulyas na rigaton nin droga sa ciudad na ini an nahulog man guiraray sa marigmat na mata asin kamot kan mga awtoridad.
Mga plastic sachet na may laog nin pigtutubudan na pinaalang na mga dahon nin marijuana
Retrato hale ki Richard Borcelis Almonte
Mga plastic sachet na may laog nin pigtutubudan na pinaalang na mga dahon nin marijuana
Retrato hale ki Richard Borcelis Almonte
Siya pigbistong si Lodovino Botalon, Jr., o mas bistado sa bansag na “Aswang.”

Sabi sa report, an mga awtoridad haloy nang pigsusunod an gira kan saiyang operasyon sa laog na nin pirang bulan.

Alagad, na-atraso an pagdakop ta mahalnas na maray an suspechado sa mga awtoridad.

Sa paagui nin maigot na pagsiyasat asin dagmang na evidencia, dae na nag-alangan an mga ahentes kan gobierno na hagadon an tabang kan Regional Trial Court (RTC) para ramalan an paratindang droga.

An matriumfong operasyon resulta kan search warrant na may numero 20014-23 na hale sa jusgado.

Durante kan pagruskay kan saiyang mga gamit sa laog kan saiyang residencia, nakua an 11ng plastic sachet nin ilegal na droga, na pigtutubudan na pinaalang na dahon nin marijuana.

Gamit an saiyang popular na bansag, haloy na suboot siyang nasa halabang listahan kan mga ahentes kan gobierno kan may mga ilegal na gibo-gibo.

An mga tiniripon na intelligence reports asin kooperasyon kan mga namamanwaan an nagpadali kan saiyang pagkadakop.

Sinangatan na nin asunto criminal si Botalon, Jr., sa pagbalga sa Section 11 kan Article II, kan Republic Act 9165, na mas bisto sa apod na Comprehensive Dangerous Drugs Act of 2002.

An operasyon kan pulis nangyari sa residencia kan suspechado sa P-6, Barangay San Roque sa ciudad na ini.

An suspechado ditinido ngonian sa laog kan carcel digdi.

Mientrastanto, 25 na gabos an mga na mga parapabakal nin droga an nadakop digdi poon sana kan Disyembre 2013.

Sinabini PCI Robert Capus, an parataram kan pulis, na 30 por ciento pa sana ini kan carculadong numero nin mga nagrigaton nin droga digdi.

An maisog na kampanya contra sa pigbabawal na droga nagpoon sana kan madistino digdi si PSupt Felix Servita.--BICOLSTANDARD.COM
Bicol news | Albay news | Camarines Norte news | Camarines Sur news | Catanduanes news | Daet news
Share:

SPECIAL OFFER

SPECIAL OFFER

Featured Post

Masbate's Villalobos Gang leader falls

MASBATE CITY 8/15/17 (Bicol Standard)--The alleged leader of Villalobos Gang, Ruel Villalobos y Amo, was neutralized in an anti-illegal...