Babae sa plaza, ahente nin budol-budol na kaogmahan

NAGA CITY—An piglalaoman na daeng siring na kaogmahan kan sarong soltero na taga-Pamukid, San Fernando, Camarines Sur, an nahulog sa pagbasol asin kamundoan kan siya maloko nin sarong babae sa plaza digdi.

An lalaki, na inapod sa bansag na Jose Malipongawon (bakong tunay na pangaran) an nag-isip na “hanapon an langit” sa sarong babae na nagtangro kan saiyang hawak, mantang naglalakaw-lakaw sa popular na lugar.

Sinabi ni Jose, pagkalihis kan “special offer” saiya sa kantidad sanang P600, sinda nagkaoyon na maglaog sa Riverbank Lodging House sa may PNR Road tanganing bulongon an saiyang pungaw.

Walong minutos sana an naka-agi, nagkaoyon an duwa sa saindang contrata.

An babae, may inapodan sa celphone, asin nadangog kan ka-contrata an tataramon na “okey.”

Tulos hinagad kan babae, na inapod sa pangaran Mercy Magatol (bakong tunay na pangaran) an kabayaran kan saindang contrata antes na magpasiring sa motel.

Para makapaseguro, P500 sana ngona an binotbot ni Jose sa saiyang bulsa, asin itinao ki Mercy.

An patanid kan babae, dae madadagos an saindang encontrada kun dae siya pagadohan kan kulang na P100, antes maglaog sa cuarto.

Pareho sindang duwa nakahuyom an lalaogon, mantang naglalakaw pasiring sa Riverbank Lodging House.

Pirang metros na sana antes makaabot sa pwerta kan motel, may nadangog si Jose na sarong siwit na kan saiyang salingoyon, sarong lalaki na nagpaypay kan saiyang kamot. Naghahagad nin cigarillo ki Jose.

Nanlungsi siya asin nag-ansyas kuta na magdulag kan marisang maisog an lalawgon kan kaatubang na nag llamada nin yosi.

Dae naghaloy, triningkahan si Jose kan lalaki na may saro pang kaiba.

Dagos siyang kinapkapan, hinanap an pitaka, pero mayong nakuang cuarta.

Pirit na nagtabang an duwang lalaki na hanapon kun saen nasaray an cuarta ni Jose.

Marikas na nadiscubre na nasasaray palan an cuarta na P12,000 sa saiyang sulot na carsoncillo, na may bulsa.

Mayong nakaheling kan bilog na pangyayari. Alagad an babae na kaiba niya, marikason na nagparadalagan padulag.

An suspecha ni Jose, an duwang lalaki kasapakat ni Mercy sa saindang pirang beses nang ginibong panloko sa mga naghahanap nin madali sanang kaogmahan.

Nadakop man guiraray si Mercy kan mga awtoridad ta may record na ini sa pulis.

Pero kan siya pig-imbestigaran, nagpahimutik na mayo nin pagkaaram kan incidente.

Si Jose Malipongawon, 31 anyos an edad, mantang si Mercy Magatol, 28 anyos pa sana.

An incidenteng ini nasa blotter kan pulis.

Alagad, pwedeng lista sana sa tubig ta habo ni Jose magplantear nin caso na madara pa nin dugang na supog saiya.–BICOLSTANDARD.COM
Bicol news | Albay news | Camarines Norte news | Camarines Sur news | Catanduanes news | Daet news

Start typing and press Enter to search