Magkarelasyon nakuang gadan sa motel sa Goa, Cam Sur

GOA, CAMARINES SUR – Duwang personas an nakuang gadan sa laog kan cuarto kan sarong motel sa banwaan na ini.

An mga imbestigador nagsabi na an mga gadan nang hawak ninda Rommel Clarino, 43 anyos, asin Joana Iraula, 22, nakua kan mga miembros kan Goa Fire Department sa laog kan Papillion Motor Lodge sa Barangay Tagongtong digdi.

Kan maglaog an mga awtoridad sa cuarto kan hotel, enot nindang naheling an bangkay ni Iraula na nakakirimo an saiyang mga takyag sa saiyang daghan.

Ini an pahayag ni Chief Inspector Chito Oyardo kan Goa Municipal Police Station sa intrevista kan DWLV.

May suspecha an mga imbestigador na pwedeng tinilok ngona ni Clarino si Iraula tanganing magadan, pagkagtapos inulaan nin gas an saiyang lawas, dangan sinubsuban.

Kan naheling na ni Clarino na gadan na si Iraola, dangan siya nagsuicide naman, sabi kan mga imbestigador.

An mga awtoridad may pagtubod na pagselos an motibo kaya ginadan an saiyang kaibibahan na babae.

Iyo man ini an sinasambit na rason kan saiyang tiyaon, kan makaolay kan mga pulis.

Mientrastanto, may mga testigo sa motel na nagsabi na antes madiscubre an saindang gadan nang lawas, nakadangog sinda nin nagkukurahaw sa laog kan cuarto, na garong may nag-iiriwal na tawo.

An mga imbestigador nakakua pa sa laog kan cuarto na pig-okupar ninda nin sarong sachet nin metamphetamine hydrochloride (shabu) asin duwang boteng gin.

An piglunadan na Honda Wave 100 na may plate number 2756EY ni Clarino an nasa poder kan mga awtoridad ngonian –BICOLSTANDARD.COM

Bicol news | Albay news | Camarines Norte news | Camarines Sur news | Catanduanes news | Daet news

Start typing and press Enter to search