20 mil sako NFA rice sa Albay naraot kan bagyo

LEGAZPI CITY—Dae makulang sa 20,000 na sako nin bagas na nasa bodega kan National Food Authority (NFA) an napiligrohan kan aboton kan baha na dara kan bagyong si Glenda.

20 mil sako NFA rice sa Albay naraot kan bagyo
Pigconfirmar ni Yolly Navarro, Provincial Manager kan NFA sa Albay, kan arasod-asodan nin mga kahapotan kan mga tawo na nanghihinayag sa naraot sanang kakanon.

“Kun ipinabakal na sa mga tawo an bagas , dae lamang kuta nasayag,” sabi kan mga nag-aagrabyong parabakal kan baratong kakanon.

“En ves na ipabakal samo an baratong bagas kan NFA, pig imot pa ini,” sabi pa.

An mga nagrereklamong parokyano kan NFA pigtutugotan magbakal nin tigduruwang kilo kada sarong mabakal.

Sabi ni Navarro, an NFA rice sa bodega ninda inabot kan makusog na uran pati baha pag-agi kan bagyong si Glenda.

Nabaklas pa an atop kan bodega kan NFA, kaya mayong defensa an mga nakakamadang sinakong bagas, sabi kan manager.

Saiyang piglinaw na dae man naubos na naraot an 20,000 na sako nin bagas.

An iba pwede pang mapakinabangan.

Ngonian, an kaipohan kan NFA iyo an “reconditioning” kan saindang stocks para isihon kun pirang porciento an mapapakinabangan pa.

Maski siring, kun igwa man nin napeligrohan na bagas pwede pa ining mabawi ta igwa sinda nin insurance digdi.

Huli kan bagay na iyan, mariribayan kan NFA an saindang stocks oras na bayadan na sinda kan insurance company. - BICOLSTANDARD.COM
Bicol news | Albay news | Camarines Norte news | Camarines Sur news | Catanduanes news | Daet news

Start typing and press Enter to search