Thursday, June 12, 2014

Maestro, tinadtad nin bala sa Lagonoy

LAGONOY, CAMARINES SUR — Mga bala gikan sa calibre .45 asin 9mm na pistola an nagtadom sa lawas ni Edwin Roque y Rellora, na naging causa kan saiyang kadaganan.

Si Roque, sarong maestro, asin designado bilang Teacher-In-Charge sa Gimagtocon Elementary School, sinurongan sa laog mismo kan saiyang oficina kan mga paragadan.

Duwang armadong lalaki na naka maskara asin nakasulot nin sunglasses an responsible sa krimen.

An sabi sa report, sa primerong parakpatak kan putok, dae tulos tinamaan nin mortal an victima.

Nagkadalagan pa si Roque paluwas sa barangay road mantang linalapag kan paragadan.

Alagad mantang nakalibre sa enot na putokputok kan badil, dae an victima nag pipinsar na may kaibahan pang saro an parabadil, na nag-aabang sa luwas.

An kaibahan kan enot na parabadil, pinutokan man si Roque, asin duman dagos na siyang na tinodas.

Si Edwin Roque, 39 anyos pa sana an edad. An saiyang residencia yaon sa Gubat, Lagonoy.

An mga awtoridad mayo pang malinaw asin pusog na informasyon tanganing mag-estgablisir kan motibo kan pag gadan sa maestro.

Mayo man na naka midbid kan mga paragadan.

Sa kapot na report kan pulis na nag gigibo kan imbestigasyon, an mga paragadan naglunad sa sarong motorsiklo na mayo nin plate number.

An mga miembros kan SOCO nakapurot nin 11ng baseyo nin bala hale sa calibre .45ng pistol asin 3ng capsula na hale sa 9mm na pistol.

Pinapahiwas pa ngonian kan mga awtoridad an pagtipon nin mga informasyon bako sanang sa lugar kan krimen, kundi sagkod sa mga pagtaraid na barangay.

An mga enot na natipon na evidencia nagpupuntariya na mayo man nin relasyon sa saiyang trabaho an mitsa kan paggadan.

Mientrastanto, an mga escuela digdi an napapatos pa nin pagkatakot sa nangyari sa laog mismo kan saindang laguerta. — BICOLSTANDARD.COM
Bicol Standard on Twitter
Bicol Standard on Facebook
Bicol Standard on Youtube
Bicol Standard on Instagram
Bicol Standard on Google+
Bicol Standard on Pinterest
Share:

SPECIAL OFFER

SPECIAL OFFER

Featured Post

DAET GARBAGE ISSUE | Sarion blames Ochoa; Ochoa to request for state audit of funds

Former Mayor Tito Sarion (left), incumbent Mayor Benito Ochoa (right) DAET, Camarines Norte—“The ball is now in the hands of the new ...