Wednesday, June 25, 2014

Mga tawong may caso, dinarakop kan pulis

CAMARINES SUR – Mayong huraw an pagdugang kan numero kan mga tawo na nadadakop kan mga pulis na maliksing nag-ooperar para magserve nin mga mandamiento de aresto hale sa jusgado.

Sa Ciudad nin Naga, dinakop kan pinagsararong fuerza kan PNP Magarao asin Camarines Sur Provincial Police Office (CSPPO) si Mamaril Aguilando y Muerong, taga Phase III, Mariners Village, Sta Lucia, Magarao.

Si Aguinaldo, na haloy nang hinahanap kan mga awtoridad, sinorpresa  kan mga pulis na may bitbit kan mandamiento de aresto sa kanto kan Balatas St. asin Magsaysay Avenue.

An dinakop na suspechado,  nag aatubang nin reklamo paglapas sa Sec 5 (h) kan RA 9262, (Violence against Women and Children) asin may mandamiento de aresto na firmado ni RTC Presiding Judge Erwin Virgilio Ferer kan Branch 20. Ini, susug sa  criminal case number RTC 13-0750.

An jusgado nag recomendar nin kantidad P24,000 sa casong nasambit, para sa saiyang temporaryong libertad.

Mientrastanto, an parehong persona, may saro  pang warrant of arrest na firmado man ni Judge Norma Oliva-Beltran, an Presiding Judge kan MTCC Branch 1, sa Ciudad nin Naga. An ikaduwang arrest warrant  mapadapit sa casong Serious Physical Injuries, may Criminal Case No. 123306, asin may fecha Junio 24, 2014. An nasambit na asunto may recomendadong piansa na kantidad P3,000.

Si Aquinaldo yaon ngonian sa kamot kan mga miembros kan PNP, Magarao.

Sa banwaan kan Tinambac, inarestar man kan pulis si Bonifacio Tagum y Arcos, Jr., 22 anyos, asin residente kan Sagrada.

Pinogol siya kan mga awtoridad bajo sa mandamiento de aresto na firmado ni Judge Crescencio L. Cortes, Jr. kan MTC Tinambac.

Para sa sa temporaryong libertad ni Tagum, an jusgado na magbugtak nin piansang P10,000.

Duman sa Nabua, an mga tawohan kan pulis rinamalan si Felix Ballecer, 44, taga Zone 1, Sto Domingo.
An mandamiento de aresto contra sa suspehcado pinaluwas ni Judge Soliman Santos, Jr., sa pag violar kan ordinansa kan banwaan. Afuera kan pwedeng ipatong na kastigong pagkapreso, si Ballecer dapat na mag bugtak nin fianza na, para sa saiyang temporaryong libertad.

Sa banwaan kan Siruma, poco mas o menos alas 7:45 nin aga kan Junio 24 kan an mga pulis digdi inarestar si Geovanie Estolonio y Chavez.

An saiyang trabaho iyo an pagiging tendero.

Inakusar si Estolonio nin casong Qualified Theft na may piansang P40,0000. An caso pendiente ngonian sa sala ni Judge Jose Sarcilla kan Branch 32 kan RTC Pili. – BICOLSTANDAD.COM

Bicol Standard on Twitter
Bicol Standard on Facebook
Bicol Standard on Youtube
Bicol Standard on Instagram
Bicol Standard on Google+
Bicol Standard on Pinterest
Share:

SPECIAL OFFER

SPECIAL OFFER

Featured Post

Daet P20M garbage project quizzed

Former Mayor Tito Sarion DAET, Camarines Norte — The pile-up of uncollected garbage in this town has urged residents to revive the inqu...