PSSupt Golingay, bagong pamayo kan PNP sa CamSur

NAGA CITY“Tulo an importanteng sugo sako kan liderato kan Philippine National Police (PNP) kan ako gibohon na Officer-In-Charge kan PNP Provincial Office sa Camarines Sur.”

PSSupt Golingay
Photo courtesy of Maria Theresa Laniog Iraola/Radyo Amigo 96.7 FM Iriga
Ini an enot na mga pahayag  ni PSSupt Primo Golingay, na nag-asumir sa saiyang pwesto bilang OIC kan PNP sa Camarines Sur, karibay ni OIC Provincial DirectorPSSupt Arnold Albis kasoodma.

Si PSSupt Albis nag balik na duman sa PNP Regional Office sa Camp Simeon Ola sa Legazpi City bilang Assistant PNP Regional Director.

Sabi ni PSSupt Golingay, tinungkusan niya an tulong importang trabaho digdi sa Camarines Sur. Ini iyo an minasunod: (1) mabawasan an kriminalidad (2) mag-gibo nin toltol na imbestigasyon kan mga nagyayaring krimen, asin ika (3), pakarayon an relasyon kan mga awtoridad sa mga namamanwaan.

Dinugang pa ni PSupt Golingay na enot na ginibo niya pagkatapos na magtukaw sa pwesto iyo an mag-courtesy call sa Executive Judge asin pamayo kan Oficina kan Procurador kan provincia.

Pagkahapon kasoodma, nag-apod siya nin meeting kan mga hefe kan police sa Provincial office. Ini sa katoyohan na mabisto niya an saiyang mga katrabaho asin dagos man na ipaisi an saiyang mga darang kasugoan.

Si Primo Golingay, sa saiyang pagpabisto, nagsabi na nag-graduar siya sa Philippine National Police Academy (PNPA) kan taon 1984. Siya taga duman sa provincia nin Capiz.

Poon kan 2000, siya nadestino na duman sa Metro Manila, alagad nagpahayag na sagkod ngonian, lawi pa man guiraray siya magtaram nin Tagalog.

Hinagad niya sa saiyang mga pag-iriba an bolanos na kooperasyon.

Mientrastanto, sabi ni PSSupt Golingay na saiyang ipapasunod sa mga pulis na dapat pirmeng nakasulot nin uniforme; dapat bakong para falta sa trabaho asin nag-aabot sa tamang oras; asin dapat pirmeng nakahuyom, mantang nagkokomple kan saindang trabaho.

An nasambit na mga rekisitos sa mga pulis, mayo man nin gasto asin bakong difisil na utobon, dinagdag pa ni PSSupt Golingay.

Inako kan bagong Provincial Director na dae pa niya aram an mga lugar sa Camarines Sur, afuera kan Ciudad nin Naga asin Pili.

Enot na inasikaso ni PSSupt Golingay an pakikiolay sa mga tawohan kan Department of Public Works and Highways (DPWH) tanganing areglaron an pirme na sanang dakulang problema sa traffic sa parte kan pinapakaray na San Jose Bridge sa Pili—May dugang na report hale ki Maria Theresa Laniog Iraola kan Radyo Amigo/BICOLSTANDARD.COM


RELATED:

Bicol Standard on Twitter
Bicol Standard on Facebook
Bicol Standard on Youtube
Bicol Standard on Instagram
Bicol Standard on Google+
Bicol Standard on Pinterest

Start typing and press Enter to search