Wednesday, April 9, 2014

Prutasan inarado; 2 gadan, 1 irido

PAMPLONA, CAMARINES SUR—Makatiritriste an inabot kan sarong familia pakatapos araduhon nin sarong pick-up truck an saindang tindahan sa gilid kan Maharlika Highway, Sitio San Vicente, Barangay San Gabriel, Pamplona, Camarines Sur amay subagong aga.

Segun sa report, an insidente nangyari poco mas o menos alas-3:50 nin maumahagon kasubago. Sa Sinabi sa pagsiyasat na nagmamaneho an driver haleng Manila, kan bigla na sanang nawaran nin kontrol kan saiyang awto pag-abot sa kurbadang parte kan Maharlika Highway. Ini naging causa tanganing banggaon kan vehiculo an tindahan asin maguyod an mga bantay kaini.

Huli kaini, tulos binawian nin buhay an mag-agom na paratinda na parehong hararom an turog kan mangyari an insidente.

Binisto ni Police Senior Inspector Samuel Año Alforte, acting chief of police kan Pamplona, an mga biktima na sinda Abraham Sta. Rosa y Agustin asin Librada Sta. Rosa y Delos Santos, parehong 72 anyos asin mga residente kan nasambit na sitio.

Irido man an makuapo kan duwa na si Christian Sta. Rosa y de los Reyes, 22, may agom. Siya dinalagan sa Bicol Medical Hospital sa Ciudad nin Naga sa tabang kan mga nagrespondeng pulis.

Dugang pa sa report, an driver kan nakadisgrasyang Nissan Frontier na may plate number FFY-824 iyo si Jay Buenavente y Irasga na residente kan Tigaon, Camarines Sur.

Boluntaryo man ining nagsuko sa mga awtoridad.

Sa oras na ini, sarong reklamo nin reckless imprudence resulting in multiple homicide and physical injuries an pigpepreparar kan pulisya kontra sa suspechado.

Mientrastanto, inako ni Alfonte na peligroso sa mga motorista an mga tindahan sa gilid kan highway.

Dinagdag pa niya na sa katunayan, nakipagulay na an Department of Public Works and Highways kan Marso 25 sa mga maysadiri kan mga tindahan tanganing tawan sinda nin patanid manungod kan saindang ilegal na pagtener sa gilid kan highway.—BICOLSTANDARD.COM
Bicol Standard on Twitter
Bicol Standard on Facebook
Bicol Standard on Youtube
Bicol Standard on Instagram
Bicol Standard on Google+
Bicol Standard on Pinterest
Share:

Featured Post

Bicol employers reminded to give 13th month pay on time

LEGAZPI CITY - The Department of Labor and Employment (DOLE) RO V reminded employers to pay the 13th month pay of their workers on time a...