Tuesday, March 4, 2014

Hugakon na police station, pinangaranan ni PD Bausa

NAGA CITY—Anom na mga banwaan sa Camarines Sur an nakakuang markang “zero” sa hinahagad na bulan-bulan na accomplishment report kan oficina regional kan Philippine National Police (PNP).
Camarines Sur Provincial Director PSSupt. Ramiro M. Bausa
An mga banwaan na may pinakamaluyang performance para sa bulan na Febrero iyo an Caramoan, Pamplona, Bombon, Gainza, Canaman asin Minalabac, sabi sa record na ipinaluwas kan PNP Provincial Office, na pinapamayohan ni PSSupt. Ramiro M. Bausa, an acting Provincial Director.

Segun sa pahayag ni Bausa, an tiniripon nindang report ipapadara niya ki PNP Regional Director Police Chief Supt. Victor P. Deona, na may kasugoan na pakusogon an kampanya kan mga pulis contra sa kriminalidad.

Si Deona, sa ibong na lado, nagpahayag sa mga miembros kan media na desidido siyang patawan nin kastigo an siisay man na namamayo nin police station sa bilog na region, kun dae sinda magtrabaho susug sa saiyang pagboot.
DON'T MISS: PD Bausa tags Iriga, Goa, Ragay as top 3 best police stations in accomplishments
An pagtanid na ini sinambit mismo kan PNP Regional Director sa conferencia kan gabos na nanunungdan na oficial kan pulis.

An ipapataw na kastigo, primero, iyo an pagsipa sainda bilang pamayo kan hepatura kan pulis sa banwaan o ciudad sa saindang distinong lugar.

An mas magabat na kastigo para sa pabayang official ini iyo an “retraining,” na gigibohon sa Camp Simeon Ola, sa Legaspi.

Kasoodma, pagkatapos na tawan ni PD Bausa nin pag-omaw an mga “outstanting police performers,” nagpahayag siya sa mga miembros kan media na ipapadara niya tulos ki RD Deona an completong report dapit sa bagay na ini.

Si RD Deona na sana suboot an mapaluwas kan masunod na desisyon.

Kan makaolay kan BICOL STANDARD si RD Deona, sinabi niya na an policy kan PNP Bicol, kun tolong beses sindang mapatunayan na dai nakaka-comple kan saindang obligasyon siring kan saiyang ipinaluwas na direktiba, dai maduwa-duwa na an Chief of Police kan banwaan haleon sa puesto, asin magkaigwa nin "retraining."

An programang ini, piglinaw ni Deona na informaran man an gabos na alkalde kan banwaan.
Mientrastanto, an sampulong “outstanding” police stations sa Camarines Sur pinangenotan kan PNP station sa Iriga City, Goa, Ragay, San Fernando, Buhi, Camaligan, Nabua, Libmanan, Pili asin Del Gallego.

An pigbasehan kan saindang marka iyo an saindang kampanya contra sa loose firearms, illegal gambling, illegal logging, supply reduction (neutralization of drug pusher), demand reduction (neutralization of drug user), asin iba pa.
Share:

Featured Post

Quack dentist arrested in Naga City

Photo courtesy of Dr. Albeus NAGA CITY (Bicol Standard) – A person believed to be a quack dentist was arrested by authorities as he was...