Saturday, March 22, 2014

Aguihon ta sa tigsik

ni Ireno Alcala

Tigsik ko an Bicol Standard
Sa paagui ni Manoy Gil na nagpalaad
Nin ilaw dalan tanganing ako makaguimaad
Tungkusan an dalan na makataong ladawan
Kan mga nangyayari sa kapalibutan.
Tigsik ko ining tikapo na nagsusurat kaniyo
Nagpuyat siya na makahaman nin artikulo
An sakong dispensa saindong pagtiyagaan
Ining napurot na mga kawing-kawing nin kaaraman.
Tigsik ko an maestra na si Manay Aida
Les Jaruci kun apudon sa pagtigsik mahurupon.
Nakaguibo pa ngani nin libro sa mga tigsik na tiniripon,
Naipublikar sa mga diyaryo
Sako man na naguin inspirasyon.
Tigsik ko ining Bicolandia
Rehiyon singko na naguimatan ta
Bantog sa mga tanawon, sa turismo maagwanta
May Mayon, may butanding na binibisita nin mga turista
Satong ibantulin na espesyal talaga
an lugar ta.
Tigsik ko an ciudad nin Naga, an puso kan Bicolandia
Sa fiesta nin Penafrancia madadalan an mga parada
Mga ikid sa tinampo, mga tugtog nin banda
Tigsik ko an mga kakanon sa rehiyon Bicol
Maguta, maharang na saimo ipapa-sampol
An bantog na Bicol Express asin pinangat na an version kadakol,
Sa sobrang gama-gama an pagkakan mo mapapadakol.
Tigsik ko an mga cancion bicolnon
Satong ibalangibog guibohon na inspirasyon.
Sa paggibo nin kanta, sa pagsali sa mga kumpetisyon
Bako sanang ‘Sarung Banggui’ an saimong tatangkuruson.
Tigsik ko an primerong kabtang kaining pagsurat
Tibaad umoy na kamo kan sakong pigkukuriyat,
Na mga tema na may maguian asin magabat,
Antabayanan sa sunod kun kamo na an masusukyat.

Si Ireno Alcala sarong kusinero sa Naess Shipping Phils. asin Wallem Maritime Services Inc. Dati man siyang brodkaster sa estasyon nin radyo sa Naga. Siya taga-Baliuag Nuevo, Minalabac, Camarines Sur.
Share:

Featured Post

Post-fiesta cleanup in Naga City

MASSIVE CLEAN-UP. City Hall employees and other participating agencies and volunteers led the Post-Pe├▒afrancia Clean-up Activity yesterday...