Thursday, March 20, 2014

Bigtime drug dealer sa Partido, dakop na

GOA, CSur–Duwang pigtotobodad na mayor na supplier nin shabu sa mga banwaan sa Partido Area an nahulog sa kamot kan mga awtoridad.

Goa, Camarines Sur
Sinda pigservehan nin search warrant na ipinaluwas ni RTC Judge Ma. Angela Acompanado-Arroyo, an Executive Judge sa RTC San Jose.

An pinagsararong fuerza kan mga pulis sa mga banwaan kan Lagonoy, Tigaon asin sa banwaan na ini an nagdakop ki Anthony Asor y Espenueva, 30, soltero, taga-San Benito, sa banwaan na ini, asin ki Alvino Dailo y Gabriel, 42, soltero, asin taga Lower Bicutan, Taguig City.

An duwa rinamalan mismo sa residencia ni Anthony Asor sa San Benito.

An huwes nagpaluwas kan kasugoan na haloghogon an residencia kan suspechado pagkalihis nin halawig na pagmanman kan hiro-hiro kan duwa, na may relasyon sa pag bariwas kan ipinagbabawal na droga.

Nakua sa poder kan mga suspechado an sarong dakulang pinaso na selyadong silag na plastic, na may laog nin pigtutobodan na methamphetamine hydrochloride o an inaapod na shabu; 4 na pidaso nin medium heat-sealed transparent sachet na may laog nin puting crystal na pulbos, na pig tutobodan na shabu; asin sarong pidasong sadit na silag na plastic sachet na an laog shabu.

Afuera kan ipinapangalad na droga, nakua pa sa saindang poder an sarong granada; 3ng lighters; 4 na pidasong ginamit nang aluminum foil na may laog na shabu residue; 9 na saradit na plastic sachet na may laog nin shabu; 2ng pidasong nakapiripit na aluminum foil; ginibo sanang tooter asin 2ng dagom.

Laen pa kan nasambit na mga bagay, nakua pa sa parehong lugar an 2ng pidaslong glock cal. 40 magazine; 1ng digital weighing scale, 1ng pidasong Ingram M11 cal. 9mm na may serial number 14674 na may silencer, 2ng pidasong Ingram M11 cal 9mm magazines; 7ng pidasong cal. 40 na bala para sa Ingram; jungle knife, cuarta na may total na P32,750.00; asin 7ng US dollar.

An nasambit na residencia igwang mga CCTV camera, na an saro infrared camera.

Igwa man nakuang digicam, video cam, asin cellphones.

An mga suspechado sinangatan nin reklamo sa paglapas sa Dangerous Drug Act of 2002.—BICOLSTANDARD.COM
Share:

Featured Post

Hundreds of public servant hopefuls join Albay CSC fair

JOB FAIR. Hundreds of city residents seeking employment flock to the two-day ‘Government Job Fair’ conducted by the Civil Service Commiss...