Wednesday, March 12, 2014

Pigsa, kurikong: uso sa mga preso

ni Oscar Esmenda

NAGA CITY—Naghagad nin tabang si Jail Supt. Bernard Sanchez kan Bureau of Jail Management and Penology (BJMP) sa ciudad na ini na ayudahan siya para maresolveran an problema mapadapit sa nagsusupay nang numero nin mga detinidong preso.

Naga City Jail Supt. Bernard Sanchez kan Bureau of Jail Management and Penology (BJMP)
Retrato: Oscar Esmenda/Bicol Standard
Sabi ni Sanchez, an presohan na tama sana sa 200 na tao, naglalangob na ngonian nin 472 personas, 29 digdi mga babae.

Huli kan grabeng surosuan sa mga cuarto, limang preso na an tinubuan nin darakulang pigsa sa manlaen-laen na parte kan saindang lawas.

Afuera sa limang preso na may darakulang pigsa, nagkapira an nagrereklamo na may namamate na sindang bukol sa lawas na pwede man na maging pigsa.

“An iba samo igwa nin kurikong, an iba panaw asin iba pang magatol na helang,” dugang pa sa reklamo.

Naga City Jail
Retrato: Oscar Esmenda/Bicol Standard
“An nagsusuno sa mga katre digdi duwa hasta tolong tawo,” sabi kan saro pang  detinido.
“Parate balagbag na sana an sakong paghigda ta mayo nang katre na matuturogan,” idinugang pa sa reklamo.

An sabi, mainit na marhay sa laog kan selda, orog nang raraot na an mga bentilador.

Si Sanchez nagpahayag na nag-aapelar siya sa mga nanunungdan, lalo na sa mga oficiales kan ciudad, na reparohon man an kamugtakan.

Itinukdo kan pamayo kan BJMP na igwa pa nin mahiwas na espasyo sa likod kan presohan na pwedeng tugdokan nin dugang na mga edificio, tanganing maakomodar an nag dadakulang numero nin mga detinido.

Mientrastanto, an pinakusog na kampanya contra sa kriminalidad, kabale na an pag dakop kan may mga mandamiento de aresto an nakapaorog kan problema.

“Huli kan pinaisog asin pinahiwas na kampanya contra sa kriminalidad, linalaoman na madugang pang maray an numero kan mga tao na malaog digdi,” sabi pa ni Sanchez.

Sa parte kan 29ng babaeng detenido, 15 an may caso sa droga, mantang an iba estafa asin iba pang krimen.

Bicol Standard on Twitter
Bicol Standard on Facebook
Bicol Standard on Youtube
Bicol Standard on Instagram
Bicol Standard on Google+
Bicol Standard on Pinterest
Share:

Featured Post

Bicol employers reminded to give 13th month pay on time

LEGAZPI CITY - The Department of Labor and Employment (DOLE) RO V reminded employers to pay the 13th month pay of their workers on time a...