Saturday, March 15, 2014

Swindler, nagpabakal 3ng gapo sa kantidad P600,000 sa Libmanan

LIBMANAN, CSurAn mga mahamis na tataramon an nagpalumoy kan boot kan sarong negosyanteng taga-Tanauan City, Batangas, para magtugot na bakalon an suboot duwang pidasong bara nin bulawan, na pagsasadire nin sarong may pangaran na Bong.

Mga bara nin bulawan
Source
Kasoodma, sa barangay Mabini, sa banwaan na ini, an victima na si Levy Lim y Zapra,53, sarong negosyante, kaibahan si Jerson Antivo, Jr., y Angeles, 27, soltero, driver, asin si Edeson Romero y Royo, 24, sarong salesman na taga-Sto, Tomas, Batangas, nakipagtagboan sa nagtitinda kan sinasabing mga bara nin bulawan.

An transaksyon mapadapit sa “gold bars,” enot na nindang napagkaoroyonan sa pira nang beses na pagtangro sa negosyante.

Sabi ni Lim, nagkaigwa siya nin interes sa tinda ni Bong, huli sa pagtubod na barato na an presyo kaini, kun i-cocomparar sa valor kun babakalon sa mercado.

An kada bara nin bulawan pig-tangro saiya sa presyong P300,000.

Tulong “gold bars” an gustong ipabakal saiya.

An pagtuparan ninda kasoodma, para iduhol na kan victimang negosyante an kabaklan kan duwang bara nin bulawan.

Sa nakaabot na sumbong sa mga awtoridad, idinuhol ni Lim an saiyang kwarta na kantidad P600,000 ki Bong.

Si Bong man, itinao ki Lim an sarong backpack na may laog suboot nin gold bars.

RELATED: 2014 budget kan Libmanan, binasura

Alagad, bago pa man ini mabukasan ni Lim, nagkuribaw na padulag si Bong, lalay-lalay an kwarta.
Kan reparohon ni Lim an sinasabing “gold bars,” bigla ining nagrulungsi kan maheling na an laog, bakong bulawan, alagad tulong birilog na gapo.

Nagprobar kuta si Lim asin an saiyang pag-iriba na lapagon si Bong. Alagad, may saro pang lalaki na nagpapahipli sa poon nin kahoy an nagbutwa sa gilid kan tinampo na may pugol nin badil. Ini tulos ipigtutok sa grupo ni Lim. An may badil na lalaki, nagsunod naman na nagdulag kaibahan ni Bong.

RELATED: Bicolana newscaster, beauty queen from Libmanan appears in 'The Legal Wife'

Mayong naginibo an negosyanteng Batanguenyo kundi an magpatuyatoy na sana pasiring sa hepatura kan pulis, tanganing mag-osip kan nangyari.

An mga awtoridad nagigibo pa kan saindang imbestigasyon mapadapit sa operasyon kan nasambit na sindikato.

An siring na modus operandi pirang beses nang ginamit kan mga pusikit na parasuba, bako sanang sa banwaan na ini, kundi sa iba pang lugar.

Bicol Standard on Twitter
Bicol Standard on Facebook
Bicol Standard on Youtube
Bicol Standard on Instagram
Bicol Standard on Google+
Bicol Standard on Pinterest
Share:

Featured Post

478 passengers stranded in Bicol ports due to 'Samuel'

PNA file photo LEGAZPI CITY -- The Philippine Coast Guard (PCG) in Bicol on Monday canceled the trips of sea vessels, grounding 478 pa...