Thursday, March 13, 2014

2014 budget kan Libmanan, binasura

LIBMANAN, CSUR—Amay na bungkaras an politika sa banwaan na ini, duwang taon pa antes kan masunod na election sa 2016.

Libmanan, Camarines Sur
Sa ginibong sesyon kan Sangguniang Bayan, ibinasura kan mayoriyang miembros kan consejo municipal an atrasado na nganing pag-aprobar kan budget para sa taon na ini. An annual budget iyo an ley na maawtorisar sa local na ejecutibo na maggastos kan fundo kan banwaan para sa mga importanteng pangangaipo ninda.

Nakapalaman sa ibinasurang 2014 budget iyo an dakulang kantidad na ayuda kan gobierno municipal, para sa mga proyekto na tinagamahan nin fundo kan Department of Social Welfare and Development, Regional Office 5, hale sa inaapod na Kalahi-CIDSS prorgam.

Sa mainit asin malanit na riribayan nin mahaharang na tataramon, kan isumiter an annual budget sa consejo, limang consejal na nagbotong kontra, mantang apat an nagbotong pabor.

Nanotaran man na dakul na mga punong barangay an nag-atendir kan deliberasyon, huli kan sindang linalaoman na awad-awad na ayuda financial hale sa gobierno municipal na nasa laog kan budget. An fundong saindang hinahagad pandugang sa saindang “counterpart” sa fundo kan barangay para sa Kalahi CIDSS program, sa Bottom-Up budget o BUB, na an makinabang iyo an mga residentes kan mga pobreng barangay.

An apat na nagpabor sa pag-aprobar kan 2014 budget iyo sinda sinda consejal Luis Cañete, Bernard Brioso, Rodel Rasonable asin an Liga ng mga barangay President asin ex-officio member kan Sangguniang Bayan na si Valiant Pen Ofemaria.

An mga nagcontra na aprobaran an 2014 budget man pinanginotan ni consejal Ariel Oriño, Jesus Camara, Alexander Mendoza,Wilma Carios asin an bagong maglayas na sa grupo ni Mayor Marilyn Jimenez na si consejal Jerry Tendero.

Si Tendero, na iyong naelihir na topnotcher na consejal kan banwaan na ini, suboot, biglang binayaan si Jimenez, kan mapromisahan ni Gob. Miguel Villafuerte na tatambodan na magkandidato bilang vice alkalde.

Siya iyo an magiging ka-tandem suboot kan pighahasing Oriño–Tendero tandem sa pirilian sa 2016.

Mientrastanto, huli kan siring na pangyayari, linalaoman na magiging matagros na marhay an pag-asenso kan pinakadakulang banwaan sa Camarines Sur.
DON'T MISS: Bicolana newscaster and former Miss Libmanan appears in ABS-CBN's The Legal Wife
Ini mangyayari ta nagpromesa an mayoriyang grupo sa consejo municipal sa pamamayo ni Oriño na saindang oolangon an budget, asin an ano man na proyekto sa lidereto ni Jimenez, sabi pa sa report.

Sa parte kan mga yaon sa lado kan oposisyon, sararo sindang nagsabi na an dai pag-aprobar kan 2014 budget huli suboot sa mga naheling nindang diferencia. (Report hale ki Jener Villarez)
Bicol Standard on Twitter
Bicol Standard on Facebook
Bicol Standard on Youtube
Bicol Standard on Instagram
Bicol Standard on Google+
Bicol Standard on Pinterest
Share:

Featured Post

Post-fiesta cleanup in Naga City

MASSIVE CLEAN-UP. City Hall employees and other participating agencies and volunteers led the Post-Peñafrancia Clean-up Activity yesterday...