Thursday, March 13, 2014

Nanlupig sa 2ng aki, makuapo, amiga kan makuapo, dinakop

ni Jener Villarez

RAGAY, CSUR—Nagkakalakaga an kaanggutan kan mga residente kan banwaan na ini sa nadakop na suspechado sa panlulugos sa saiyang duwang aki,  aki sa aki niya, asin an amiga kan saiyang aki asin makuapo na.

An suspechado sa panlulugos sa saiyang duwang aki, makuapo, asin amiga nin makuapo
(Retrato: Jener Villarez/Bicol Standard)
Si Florenio Madrogaba y Carpo, an suspechado sa mga reklamo, 57, sarong paraoma, asin resindete kan barangay Upper Binahan sa banwaan na ini.

Nadakop siya kan pinagsarong fuerza kan police stations kan Lipa City  asin Ragay duman sa Barangay Pangao, Lipa City.

Segun sa imbestigasyon kan mga autoridad, an suspechado enot na linupigan an saiyang duwang aki. An saro digdi, iyo si Paula (bakong tunay na ngaran) nagbados, asin namundag an sarong aking babayi. An aki niya sa saiyang aki na si Juanita (bakong tunay na ngaran), kan an edad sa pagultanan kan 12 sagkod 16 anyos, suboot pirang beses man na pinagparalupigan kan suspechado.

An saro pa sa saiyang victima iyo saiyang ngohod na aki na si Teresa (bakong tunay na ngaran), nag-osip man na pirang beses man siyang linugusan kan saiyang ama. Nangyari an panlulupig kan siya nag-eedad pa sanang 10 sagkod 14.

Suboot, si Paula dai na nagreklamo huli ta nag-agom na ini.

Alagad, kan linupigan pa si Angela (bakong tunay na ngaran), na nag-eerok sa kataid nindang harong, asin kakawat ninda Juanita asin Teresa, nagkusog na nin boot an tolo na magdolok sa autoridad asin magreklamo.

An pinakaultimong panlulupig nangyari kan fecha 22 kan bulan na Noviembre, taon 2012.
Sa mga reklamong nasambit, si Judge Irma Isidora M. Boncodin-Zamundio kan RTC Branch 57, asin Judge Cecilia R. Borja-Soler kan RTC Branch 29 parehong nagpaluwas nin mandamiento de arresto contra ki Madrogaba.

Sa duwang sala kan RTC pendiente ngonian an nasambit na mga asunto.

Bicol Standard on Twitter
Bicol Standard on Facebook
Bicol Standard on Youtube
Bicol Standard on Instagram
Bicol Standard on Google+
Bicol Standard on Pinterest
Share:

Featured Post

Bicol employers reminded to give 13th month pay on time

LEGAZPI CITY - The Department of Labor and Employment (DOLE) RO V reminded employers to pay the 13th month pay of their workers on time a...